Sápmi |

Elossa 24h -tv-ráiddu ođđa bajis čuovvut maid Giehtaruohttasa dearvvašvuođadikšu bargobeaivvi

Elossa 24h -ráiddu ođđa buvttadanbadji álgá sotnabeaivve.

Paula Keski-Kujala
Dearvvašvuođadikšu Paula Keski-Kujala lea bargan Gilbbesjávrris jagis 1997 ja liiko bargosis hui olu. Govva: ITV / Yle

Dearvvasvuođadikšu Paula Keski-Kujala bargá Giehtaruohttasis. Son orru Ruoŧas, ja lea fárus bálkkašuvvon Elossa 24h -tv-ráiddus, man ođđa buvttadanbadji álgá dan vahku sotnabeaivve.

Tv-ráiddu jurddan lea čuovvut ovtta beaivve dáhpáhusaid buohcceviesuin miehtá Suoma. Keski-Kujala ii álggus áigon searvat prográmmii.

– De jurddašin, ahte juos dás háliidit ráhkadit tv-prográmma, de ok, munhan dušše barggan iežan barggu das, ahte in dárbbaš neaktit.

Prográmma govvema galggai plánet ja válmmaštallat olu. Keski-Kujala muitala, ahte prográmmii govvejuvvui maid okta sámegielat jearahallan. Son sávvá, ahte dat čájehuvvo prográmmas.

Keski-Kujala mielas kámera ovddas bargan orrui álggos hui gelddolaš.

– Earenoamážit govvenbeaivve iđđes go kámerat vurde rája alde. Muhto dalle go bessen bargat bargguidan, de in muittán oba dan kámera.

Paula Keski-Kujala
Dearvvašvuođadikšu Paula Keski-Kujala lea iešge geahččan Elossa 24 h -tv-ráiddu, man viđat bajis son ieš lea fárus. Govva: ITV / Yle

Ođđa baji guovddáš temá lea korona

Paula Keski-Kujala muitala, ahte Elossa 24h -ráiddu ođđa bajis guovddáš temá lea korona ja mo dat váikkuha dearvvašvuođasuorggi bargiid bargui. Dasa lassin beassat oaidnit dábálaš dearvvašvuođadikšu barggu Giehtaruohttasa guovllus.

– Mu iđit álggii varraiskosiin. Dasto lei maiddá doaktára vuostáváldin ja beassat oaidnit dan beali, ahte dearvvašvuođadikšut barget dáppe ovttas doaktáriin.

Keski-Kujala goit árvala, ahte dearvvašvuođadikšu bargu viiddisvuohta ii goittotge boađe ovdan ráiddus dákkárin, mo dat duođai lea. Son muitala, ahte sus leat oalle guhkes bargomátkkit ja guhkes bargobeaivvit.

Paula Keski-Kujala muitala Elossa 24h -tv-ráiddu govvemiid birra. Jietna: Sáárá Seipiharju / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä