Sápmi |

Enni Similä jođihišgoahtá Suoma Sámi Nuoraid – searvvis lea sávaldat sámenuoraide

Suoma Sámi Nuorat -searvi doalai jahkečoahkkima mannan vahkuloahpas.

Suoma Sámi Nuorat SSN
Suoma Sámi Nuorat -searvi doalai jahkečoahkkimis mannan vahkuloahpas. Govas stivrra lahtut, gurut bealde Sunná Valkeapää, Petra Laiti, Enni Similä, Nils Joel Partapuoli, Anne Olli, Teija Kaartokallio ja Juhán-Tuommá Magga. Govva: Suoma Sámi Nuorat

Suoma Sámi Nuorat -searvi (SSN) čoahkkanii mannan vahkuloahpas jahkečoahkkimii Anára Rivdolii, Vasatokka nuoraidguovddážii. Čoahkkimis válljejedje searvái ođđa stivrra.

Searvvi ođđa ságadoallin válljejuvvui Enni Similä, guhte lea ovdal doaibman searvvi várreságadoallin. Similä lohká ságadoallin válljejumi leat gelddolaš. Son vuordá iluin boahttevaš baji.

– Vuorddán gal hui mielain boahttevaš jagi ja maid dat buktá. Lean dieđusge giitevaš, ahte lean ožžon dán luohttámuša.

Háliidit ođđa nuoraid mielde searvvi doaimmaide

Ođđa ságadoalli muitala, ahte searvi ordne mielas iešguđetlágán doaimmaid nuoraide, muhto okta čuolbma, man galggašii čoavdit lea dat, mo oažžut nuoraid fárrui searvvi doaimmaide. Suoma Sámi Nuorain leat dál sullii čuohte lahtu.

Enni Similä muitala, ahte stivrra doaibmaplánas leatge háliidan dál giddet eanet fuomášumi lahttodoaimmaide. Ságadoallis lea sávaldat sámenuoraide.

Enni Similä
Enni Similä bargagoahtá SSN ságadoallin. Son lea ovdal leamaš searvvi várreságadoalli. Govva: Kirsti Helena Länsman / Yle

– Mii háliidivččiimet hui mielas ođđa lahtuid! Mii ordnet lahtuide deaivvademiid, kurssaid ja eará diekkáriid.

– Dieđusge joatkit maiddái daiguin seamma áššiiguin go ovdalge, váldit beali dehálaš sámeáššiide ja leat fárus aktiivvalaččat.

Enni Similä muitala, ahte Suoma Sámi Nuorat -searvi háliida leat máŋggabealat searvi, ja sii sávvet ahte nuorat maid fuobmájit dan vai vulget fárrui searvvi doaimmaide. Similä muitala, ahte sii háliidit fállat iešguđetlágán vejolašvuođaid nuoraide.

– Dat leat nu iešguđetlágán beroštumit, ja mii gal háliidit geahččalit fállat nuoraide juoidá, mas sii leat beroštuvvan.

Oktan ovdamearkan Similä namuha sámegielat astoáiggedoaimmaid.

– Nuoraide eai leat dál nu olu astoáiggedoaimmat sámegillii. Mii leat smiehttan, ahte háliidivččiimet goasnu fállat vejolaččat astoáiggedoaimmaid dahje muhtin kurssaid. Dat orru leamen vehá sávaldat dál nuoraid gaskkas, muitala Similä searvvi plánaid birra.

Varrasamosat: Sápmi

Váldoođđasat

Varrasamosat

Muualla Yle.fi:ssä