Stefanie Sarre áásá Ucjuuvâst já suu ákku Avelist puárásij táálust. Táválávt suái laaviv teivâđ ain motomin njunáluvâi, mut tääl korona äigin taat ij lah máđhulâš. Enijpeivi lii-uv kuoskâtteijee, ko talle lii lam tääbbin mušteđ ááhu.

– Muu mielâst lii väivi, ko jiem peesâ suu luusâ, sun lii mudoi-uv ohtuu tobbeen Avelist, jiemge peesâ eelliđ suu kulen, muštâl Sarre.

Ulmuuh láá keksim maaŋgâlágánijd koonstâid ohtâvuođâi tolâmân. Láá puhelimeh já Skype-ohtâvuođah, mast puáhtá uáiniđ-uv nubijdis. Stefanie Sarre áigu mušteđ ááhus enijpeeivi táválij ärbivuáválij konstáin.

– Mun ááigum suáittiđ sunjin já tiäđust-uv val vuolgâttâm sunjin enijpeivikoorti, tot lii tie taan ive, iätä sun.

Torvoteivâmtáálu enijpeiviseŋkkân

Maaŋgâ saajeest láá hoksám orniđ tagarijd sierâ tááluid, kost rävisulmuuh pyehtih eres ulmuigijn teivâđ torvolávt. Avveelliih irâtteijeeh Matti Meskanen já Sauli Holmberg hoksáin skeŋkkiđ tágárijd tááluid, maid puáhtá sirdeđ pääihist nuubán.

– Mun oinim loostâst uccâ mainâsii, kost lâi tággáár uccâ kámppááš, já tost poođij juurdâ, et mij-uv kolgâp huksiđ muáddi tággáár já koijâdij kandâstis, sii irâttâs toimâttâhhoovdâst, et maht ličij taat hommá. Antti eeđâi, et mishân láá jo tágáreh valmâšin, toid ko váhá tivost, te laa tie, muštâl Holmberg.

Taan huápum iä kiergânâm enijpiäiván ko nube táálu uážžuđ valmâšin.

– Tast puátá enijpeeiviskeŋkkâ, vaahâg ko ep kiergânâm uážžuđ kuohtuid valmâšin. Taat mana Mänikkön já nubbe valmâštuvá puáttee ohhoost, loppeed Holmberg.

Holmberg já Meskasii fáárun vuolgii Avelist meid iärráseh. Ivalon Lukko lii luuhâid skeŋkkim, Euronics jienâpiergâsijd já kundá mediapääji luoihât mikrofonijd já huolât, et tekniik tuáimá. K-Ryevdi skeŋkkij uuvsâid já eres huksimkáálvuid.

– Já mii huksimpargeid kalga adeliđ stuorrâ kijttosijd, ko sii láá huksim ennuv pälhittáá, kijttâl Holmberg.

Taah tááluh, maid tääl tivoh teivâmtáállun, te láá váhá stuárráábeh. Taah láá lam turistij kiävtust, mut tääl ko turisteh iä lah, te taah láá jyevdilâssân. Táálu juáhhoo kaskoo rasta, nube pelni láá puáráseh já nubebelni puáhtá leđe veik ubâ peerâ. Laasa kooskâst já mikrofonij peht savâstâlleh.

– Tast lii kovjâčavos, plastikkijn já teipijkin skođâstum, nuuvt et tost iä kolgâččij uccâ bakteerehkin peessâđ čoođâ, loppeeh Holmberg.

Holmberg huksim irâttâs lii vaalmâš huksiđ tagarijd syeji teivâmtááluid veik mon ennuv já veik pirrâ Euroop.

– Jos tágárijd, váhá ucebijd huksee, te ohhoost puáhtá uážžuđ vittá-uv valmâšijn, loppeed Holmberg.