Sápmi |

Erika Sarivaara dohkkehuvvui sápmelažžan

Erika Sarivaara dohkkehuvvui sápmelažžan. Dát boahtá ovdan Alimus hálddahusrievtti jahkegirjemearrádusas. AHR dohkkehii gaskavahku 93 ođđa olbmo sápmelažžan Sámedikki dáhtu vuostá. Váidaleaddjit ledje 182.

Erika Sarivaara lea pedagogihka doavttir, Vuovde-, guolásteaddji- ja duottarsámit -searvvi ságadoalli ja SDP gielddapolitihkar Anáris.
Erika Sarivaara Govva: Erika Sarivaara

AHR vuosttas jahkegirkemearrádusa detáljain boahtá ovdan, ahte okta sápmelažžan dohkkehuvvon olbmuin lea dutki Erika Sarivaara.

Jahkegirjemearrádus lea dáppe suomagillii ja seamma dieđut leat oanehaččat dáppe sámegillii.

Sarivaara galgá atnit sápmelažžan AHR mielde danin, go son nállášuvvá jagis 1739 eanangirjái merkejuvvon lappalaččas, daningo son lei jáhkehahtti láhkai čájehan iežas sámi sohkaduogáža ja nanu oamastuvvama sihke priváhta- ja ámmáteallimisttis sámegillii ja sámi kultuvrii.

Su galgá AHR mielde ollislaččat árvvoštaladettiin gehččot sápmelažžan.

Erika Sarivaara ii hálit kommenteret ášši.

AHR jahkegirjemearrádusas muitaluvvo, ahte Sarivaara akkástalla iežas sápmelašvuođa earret eará dáid ákkaiguin.

"Váidaleaddji sápmelaš ustitbire lea viiddis ja dat fatmmastá Suoma lassin maiddái Norgga ja Ruoŧa beallái. Sápmelaš ustibat gullet sámedikki válgalogahallamii. Suoma sámedikki válgalogahallamis leahkki ustibat leat vuolláičállán sámeservoša joavkodohkkeheami, mas sii dovddastit ahte váidaleaddji lea sápmelaš”

"Joavkodohkkeheami gáibádus ii vuođđuduvvo vuoimmis leahkki riekteortnegii. Dat vuohki, mo dat dál duohtandahkko, lea vuođđolága vuoiŋŋa vuostá. Joavkodohkkeheami guoski mearrádusaid duohken lea hui unna sápmelašjoavku.

"Váidaleaddji lea oahppan mánnávuođa rájes johtit luonddus, murjet, guolástit, meahcástit ja málestit árbevirolaš biepmu.Váidaleaddji vánhemat leaba oahpahan meahcis birgendáidduid."

Varrasamosat: Sápmi

Váldoođđasat

Varrasamosat

Muualla Yle.fi:ssä