Sápmi |

Erva Niittyvuopio ja Eija Seppä nammaduvvuiga proavástin – "Sámebargu lea boahtán oidnosii ja das álgá leat dihtolágan sadji girkus"

Árvonamma lea dovddastus ánssuin báhpa girkolaš barggus.

Erva Niittyvuopio lea Oulu bismagotti sámebarggu čálli.
Oulu bismagotti sámebarggu čálli Erva Niittyvuopio nammaduvvui diibmá Jagi báhppan 2018. Govva: Vesa Toppari / Yle

Oulu bismagotti bisma Jukka Keskitalo lea nammadan sámebarggu čálli Erva Niittyvuopio ja Perho searvegotti girkohearrá Eija Seppä proavástin.

Bisma mieđiha jahkásaččat árvonama báhpaide, geain leat erenoamáš ánssut girkolaš barggus ja geat leat deavdán 50 jagi.

Niittyvuopio ja Seppä lassin Oulu bismagotti proavástin nammaduvvojedje dán jagi Suoma vuolggahussearvvi Lagas-Nuortti ja Davvi-Afrihká barggu guovlohoavda Jukka Hautala, Tervola searvegotti girkohearrá Heikki Holma ja Oulu searvegotti jođiheaddji bearašrávvejeaddji Ilkka Kurjenmäki.

Oaidná árvonama dovddastussan sámebargui – "Das álgá leat dihtolágan sadji dán girkus"

Niillas Áslat Erva dahje Njearrejár-Risten Erva, Erva Niittyvuopio lea Gáregasnjárggas eret. Son vihahuvvui báhppan jagi 2005 ja son leage vuosttas sámenissonbáhppa. Sámebarggu čállin son álggahii jagi 2008.

Diibmá Niittyvuopio nammaduvvui jagi báhppan 2018. Dan ja proavásta árvonama son oaidná dovddastussan namalassii girku sámebargui.

– Dat mearkkaša dan, ahte mun dieđán, ahte dát sámebargu lea boahtán oidnosii ja das álgá leat dihtolágan sadji dán girkus. Diená geahčan dán árvonama ja maiddái jagi báhppan válljejumi dán barggu čađa.

Niittyvuopio ii dán muttus máhte dadjat, mo árvonamma boahtá váikkuhit su bargui. Son áigu joatkit iežas barggu dego dábálaččat.

– Dieđusge dál obba áigge bargu šaddá álkibun, go dat álgá leat oidnosis girkus máŋgga dásis. Maiddái searvegottit álget jo ieža láhčit dakkár dilálašvuođaid, ahte ii dárbbaš šat vuolgit juohke sadjái. Dál gávdnojit olbmot ja sápmelaččat ieža leat hui aktiivvat. Dat lea hui somá, illuda Niittyvuopio.

Bivddii Ipmilis mearkka, ahte lea rivttes bálgá alde – seamma beaivve nammaduvvui proavástin

Eija Seppä barggai 20 jagi Ohcejoga searvegotti diakonan. Dan maŋŋá son gaccai teologiija oahpu ja lea dál bargan čieža jagi báhppan.

Sutnje proavásta árvonamma lea stuorra gudni.

– Dat lea nu stuorra árvu ja dat mearkkaša munnje eambo go mihkkige dán báhpalaš eallimis. Dat lea munnje ráhkes ášši.

Eija Seppä
Eija Seppä vihahuvvui Perho searvegotti girkohearrán geassit 2018. Govva: Priváhtta

Seppäs lei leamašan garra beaivi, ovdal go gulai dovddastusas. Son muitala iežas bivdán Ipmila čájehit, ahte son lea rivttes bálgá alde.

– Mun dadjen, ahte Ipmil, atte munnje muhtin mearkka vai mun dieđán, ahte mun lean árvvolaš olmmoš ja ahte mun lean rivttes geainnus, ahte dál mun dárbbašan du mearkka.

Beaivvi loahpas son gulai illuođđasa ja measta ii jáhkkán dan duohtan.

– Mun ledjen dadjan Ipmilii, ahte atte munnje vehá, ja mun ožžon dákkára. Dát lei gal Ipmiliige jo menddo olu, čaibmá Eija Seppä.

Bisma Jukka Keskitalo geige ođđa proavástiidda duođaštusa árvonamas skábmamánu 30. beaivve.

Erva Niittyvuopio ja Eija Seppä jearahallamiid sáhtát guldalit Yle Areenas maŋŋebárgga Yle Sámi iđit -sáddagis.

Varrasamosat: Sápmi

Váldoođđasat

Varrasamosat

Muualla Yle.fi:ssä