Sápmi |

Esko Aikio sámedikki mearreáigásaš ealáhusčállin

Sámediggi válljii juo ealáhusčálli. Ozus lea vel gielladorvočálli, man sadjásašvuhtii nohká ohcanáigi vuossárgga 11.9. dii 16.00.

Esko Aikio
Esko Aikio válljejuvvui ealáhusčállin. Govva: Kirsti Länsman / Yle Sápmi

Ohcejohkalaš Esko Aikio lea válljejuvvon sámedikki mearreáigásaš ealáhusčállin. Ealáhusčálli bargun lea válmmaštallat sámiid ealáhusaide ja sámiid ruovttuguovllu eanangeavaheapmái guoski áššiid, mat gusket ealáhussuorgái. Son lea maiddái ealáhus- ja vuoigatvuođalávdegotti čálli.

– Min mearreáigásaš ealáhusčálli Esko Aikio lea álgán bargui otne, dadjá sámediggi hálddahushoavda Pia Ruotsala-Kangasniemi.

Ruotsala-Kangasniemi namuha ealáhusčálli dehálamos bargun válmmaštallat buot ealáhusáššiid,  muhto son bargá maiddái sámi ruovttuguovlluid eanageavaheapmái gullevaš áššiiguin.

– Vuovdedoallu lea okta daid dehálaš áššiin mainna ealáhusčálli maid bargá.  Ja son bargá maid ovttas sámedikki birasčálliin golleroggamii laktáseaddji áššiiguin, joatká Ruotsala-Kangasniemi.

Ealáhusčálli lea sámedikkis ođđa vakánsa. Álggos dat devdojuvvo mearreáigásaččat, go ruhtadeapmi lea sihkkarastojuvvon dušše dán ja boahtte jahkái, čilge sámedikki hálddahushoavda. Ruotsala-Kangasniemi joatká, ahte ulbmil lea oažžut barggu fástan dan dihte go ealáhusčállái lea oallelágan dárbu.

Ozus maid gielladorvočálli – ohcan nohká vuossárgga 11.9.

Sámediggi ohcá dál maiddái gielladorvočálli sadjásačča. Gielladorvočálli bargui ohcanáigi nohká vuossárgga 11.9. dii 16.00. Sámediggi ohcá dál álggos sadjásačča jagi lohppii. Maŋŋelis virgi rahppojuvvo fásta, dadjá Sámediggi hálddahushoavda Pia Ruotsala-Kangasniemi. 

Dálá gielladorvočálli Siiri Jomppanen lea báhcimin ealáhahkii čavčča mielde.  

– Mii leat bidjamin fásta gielladorvočálli virggi ohcanláhkai golggotmánus ja juovlamánu dievasčoahkkimis Sámediggi galggašii válljet dasa olbmo, dadjá Pia Ruotsala-Kangasniemi.

Sámedikki bargoohcamušas gielladorvočálli bargun máinnašuvvo, ahte Sámedikki Gielladorvočálli doaibmá gielladoaimmahaga hoavdan ja giellaráđi áššemeannudeaddjin. Lassin bargguide gullet earet eará gohcit ja čuovvut sámi giellalága ollašuvvama, juohkit dieđuid sámi giellalágas ja sámiid gielalaš vuoigatvuođain, rávvet ja oahpistit sámeálbmoga ja virgeoapmahaččaid sámi giellalága heiveheamis.

Bargoohcamušaid galgá doaimmahit Sámedikki čállingoddái 11.9.2017 dii 16.00.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä