Sápmi |

Etnogálas bálkkašuvvui prošeakta, mas leigga mielde Pirita Näkkäläjärvi ja Hildá Länsman – Vildá ja Auri Ahola báhce bálkkašumiid haga

Duorastaga Etnogála sáhttá geahččat Yle Areenas.

Propagandaa-konsertin esiintyjät
Propagandaa-konsearttas čuojahedje ja lávlo Sini Siipola (gur.), Amanda Kauranne, Helmi Camus, Minna Koskenlahti ja Hildá Länsman. Govva: Kira Leskinen / Propagandaa-konsertit

Dán jagáš Etnogála Jagi fenomenan bálkkašuvvui ikte duorastaga feministtalaš álbmotmusihkkakonseartaráidu, man namma lea Varra, porno ja propagánda, JUMALAUTA!

Bálkkašuvvon konseartaráiddu Propagánda-konsearttas Hildá Länsman lávllui, juoiggai ja čuojahii bohccočoarvvis duddjojuvvon gándila. Pirita Näkkäläjärvi barggai konseartta duogáškonsultan ja jorgaleaddjin. Son lei oasis konsearttain maiddái Länsman sadjásažžan juoigin.

Konsearta gieđahalai dáiddalaš vugiiguin earret eará dan, makkár propagánda olbmot leat áiggiid čađa gullan ja buvttadan, mo álbmotmusihkka ja -árbi lea geavahuvvon hábmedettiin Suoma muitalusa ja makkár áššiin lea lávlojuvvon, ja makkár fáttát leat sensurerejuvvon musihkas. Das gieđahalle maiddái sámeáššiid degomat dan, makkár mearkkašumit gávttis leat sámi kultuvrras.

Njealjeoasat Varra, porno ja propagánda, JUMALAUTA -konseartaráiddu bargojoavkku aitosaš lahtut leat Amanda Kauranne, Helmi Camus, Minna Koskenlahti ja Sini Siipola, buvttadeaddji Mari Pääkkönen ja veahkkebuvttadeaddji Elina Lajunen.

Konseartaráiddu ovdanbukte vuosttas háve miehtá Helssega njukčamánus 2018 gitta ođđajagimánnui 2019. Giđđat 2020 prošeavtta lávlagiin áigot almmustahttit EP-skearru.

Vildá ja Ahola eai birgen

Etnogálaevttohassan lei maiddái Hildá Länsman ja Viivi Maria Saarenkylä Vildá-musihkkajoavku easkkaálgiid kategoriijas, ja dánsu ja sámekultuvrra leanadáiddár Auri Ahola jagi dánssadahkki kategoriijas. Vildá ja Ahola báhce goittot dán háve bálkkašumiid haga.

Easkkaálgiid kategoriija vuittii Vimma ja jagi dánssadahkkin válljejuvvui Timo Saari. Vimma-jovkui gullá maiddái Pessi Jouste.

Oktiibuot gálas ledje čieža kategoriija. Jagi Álbmotmusihkkadahkkin bálkkašedje Timo Alakotila, jagi riikkaidgaskasažžan šaddin (su. kansainvälistyjä) Johanna Juhola, jagi artistan Juurakko ja Risteys-bálkkašumi oaččui Eva Jakob. Dasa lassin jagi fenomena -gudnemáinnašumi ožžo Duo Emilia Lajunen & Suvi Oskala čitnadioksiiddahis sihkkelastintuvrrat.

Vuoitit ožžo bálkkašupmin muoras dahkkon Etnogála-távvala. Duorastaga Etnogála sáhtát geahččat Yle Areenas.

Etnogála lágiduvvui dál goalmmát geardde. Vuosttas Etnogálas skábmamánus 2017 Hildá Länsman vuittii Risteys-bálkkašumi. Nuppi etnogálaš ođđajagimánus 2019 Hildá Länsman ja Ulla Pirttijärvi-Länsman Solju-joavku válljejuvvui jagi álbmotmusihkkadahkkin.

10.1. dii 12.50: Gaskabajilčálus "Dán háve sámit eai birgen eará kategoriijain" divvojuvvon hápmái "Vildá ja Ahola eai birgen".

Varrasamosat: Sápmi

Váldoođđasat

Varrasamosat

Muualla Yle.fi:ssä