Sápmi |

EU searvá vuosttaš geardde mielde Árktalaš Ekspedišuvdnii – Mielde maiddái sámi ovddasteaddjit

Árktalaš Ekspedišuvnna ulbmilin lea oahpásnuvvat eamiálbmotkultuvrraide Kanáda árktalaš guovlluin ja Ruonáeatnamis.

Pirita Näkkäläjärvi
Pirita Näkkäläjärvi lea vuosttas bajásgeassi, gii ovddasta Eurohpa Uniovnna Students on Ice -ekspedišuvnnas. Govva: Laura Pieski / Yle Sápmi

Ihtin maŋŋebárgga álgá Students on Ice jagi 2019 Árktalaš Ekspedišuvdna mii bistá 16. beaivvi. Ekspedišuvdna čohkke oktii badjelaš 100 logahat- ja universitehtastudeantta Davvi-Amerihkás, Mátta-Amerihkás, Eurohpás ja Ásias. Ekspedišuvnna ulbmilin lea oahpásnuvvat eamiálbmotkultuvrraide Kanáda árktalaš guovlluin ja Ruonáeatnamis. Mátki álgá maŋŋebárgga 23.7. ja dát lea vuosttas geardi, go Eurohpa Uniovdna searvá Árktalaš ekspedišuvdnii.

Oassin guoibmevuođa, EU ruhtada njealji olbmo oassálastima ja sádde ekspedišuvdnii golbma studeantta ja ovtta bajásgeassi sámi servošiin Ruoŧa ja Suoma bealde.

Yle Sámi ovddeš hoavda Pirita Näkkäläjärvi lea searvamin Árktalaš ekspedišuvdnii Eurohpa Uniovnna ovddasteaddjin ja son lea vuosttas Eurohpa Uniovnna bajásgeassi ekspedišuvnnas. Näkkäläjärvi muitala, ahte sus ii lean ovddežis diehtu ekspedišuvnnas ovdal go Eurohpa Uniovnnas válde sutnje oktavuođa ja jerre su mielde searvat.

– Dat lea dakkár prošeakta dahje fidnu, man Kanáda lea ordnen juo measta 20 jagi ja mii vuolgit 100 bajásgeassi eanaš Kanádas, ja mun lean dál vuosttas gii vuolgá EU beales ja de čuohte studeantta, muitala Pirita Näkkäläjärvi.

Eurohpa Uniovdna mielde vuosttas háve

EU-bajásgeassi Pirita Näkkäläjärvi mielde ekspedišuvdnii ozadettiin galggai diehtit ja čilget čielgasit, makkár prográmma sáhtášii bajásgeassin fállat ja manin justa son galggašii válljejuvvot. Näkkäläjärvi mielde báikkis galggai gilvvohallat.

– Mii bajásgeassit galgat doallat doppe iešguđetlágan logaldallamiid, bargobájiid, muitalit iežamet áššiid dahje maid birra mii diehtit daid birra ja de dat studeanttat besset oahppat hui olu dakkár dego luonddubirrasis ja eamiálbmotbirrasis doppe Kalaallit Nunatas ja Kanádas.

– Dál dieđusge lea hui stuorra gudni doalvut sámi áššiid dohko ja doaivvu mielde dat lihkostuvvá danin go dat livčče hui fiinna ássi ahte EU háliidivčče joatkit dán ovttasbarggu ja gii diehtá sáhtášii sáddet eanet ja eanet olbmuid, eanetge sámi nuoraid dáppe ja EU bajásgeassiid. Lea maiddái ovddasvástádus ahte galgá lihkostuvvat dát mátki bures, dadjá Pirita Näkkäläjärvi.

Moadde sámenuora studeantan dáhpáhusas

Ekspedišuvdnii servet oktiibuot badjel 100 nuora miehtá máilmmi. Jon-Erik Näkkäläjärvi lea nuorra boazosápmelaš ja studeanta Suoma beale sámis ja son lea vuolgán reisui studeantan. Näkkäläjärvi lassin maiddái Ruoŧa beale Sámis vuolgiba guokte studeantta mielde dán ekspedišuvdnii.

Dieđáhusas muitalit, ahte mátkki áigge studeanttain lea vejolašvuohta oassálastit beaivválaš bargobájiide, maid jođihit movttiidahtti dutkit, eallilan olbmot, musihkkárat, árvvus adnojuvvon olbmot, historihkkárat, njunušáššedovdit ja innováhtorat. Studeanttat leat olles áigge luonddu- ja eamiálbmotbirrasis, gos sii skuvlejuvvojit ja hástaluvvojit govahallat ja huksegoahtit buoret máilmmi boahttevaš buolvvaide. Seammás sii čatnet oktavuođaid olleseallin ahkái.

– Dát lea vuosttas jahki, go nuorat juohke sirkumpolára riikkas servet Student on Ice - ekspedišuvdnii, ja mii leat giitevaččat Eurohpa Uniovnna Kanada-delegašuvdnii sin doarjagis, muitala Student on Ice -presideanta ja ekspedišuvnnajođiheaddji Geoff Green.

Jon-Erik Näkkäläjärvi
Nuorra boazosápmelaš Jon-Erik Näkkäläjärvi lea vuosttas háve vuolgimin ná guhkás eret Sámis. Jon-Erik bargá maiddái Sohkaršohkka-nuoraidprográmmas Yle Sámis. Govva: Xia Torikka / Yle Sápmi

Jon-Erik Näkkäläjärvi illuda vuolgit mátkái, vaikko son ii vel dárkilit dieđe mii ekspedišuvnnas ja bargobájiin konkrehtalaččat geavvá.

– Mun vuorddán ahte mun beasan oahppat dain juoidá ođđasa ja oaidnit vehá máilmmi.

– In leat goasse nu guhkkin fitnan ja muhtumathan gal fitnet jagi dahje jahkebeali doppe molssastudeantan, muhto mun jáhkán ahte munnje doallá gal duot moadde vahku hui bures ná álgui, go mun in leat ieš nu hirbmat olu reisen inge goit akto, smiehtada Jon-Erik Näkkäläjärvi.

Eanet áššis sáhtát guldalit Buorre Iđit Sápmi -sáddagis.

Varrasamosat: Sápmi

Váldoođđasat

Varrasamosat

Muualla Yle.fi:ssä