Sápmi |

Eurohpa ráđi áššedovdit ávžžuhit Suoma stáhta čujuhit bissovaš ruhtadeami sámi giellabargui ja ovddidit olbmuid áddejumi sámegielain

Eurohpa ráđi áššedovdikomitea lea almmustahttán iežas ávžžuhusaid Suoma stáhtii vehádatgielaid dili buorideapmin. Ávžžuhusat leat ádjánan, daningo Suoma eiseválddiid muitalus Eurohpa ráđđái maŋŋonii badjel guhtta jagi.

Saamelaiskulttuurikeskus Sajos Inarissa
Govva: Vesa Toppari / Yle

Eurohpa ráđi áššedovdikomitea almmustahtii otne duorastaga iežas ávžžuhusaid Suoma stáhtii vehádatgielaid dili buorideapmin.

Ávžžuhusat leat ádjánan, daningo Suoma eiseválddiid viđát mearreáigemuitalus Eurohpa ráđđái maŋŋonii badjel guhtta jagi.

– Raporta maŋŋonii badjel guhtta jagi, mii duođas váttásmahttá gohcinorgána beaktilis barggu, komitea fuopmášahttá.

Suopma lea čatnasan čuovvut Eurohpa guovlo- dahje vehádatgielaid guoskevaš vuođđogirjji mearrádusaid. Vuođđogirji lea máilmmi áidna riikkaidgaskasaš soahpamuš, mainna dorjot vehádatgielaid. Suopma galgá raporteret vuođđogirjjis addon mearrádusaid ollašuvvamis juohke goalmmát jagi Eurohpa ráđđái, man áššedovdikomitea de addá riikii ávžžuhusaid vehádatgielaid dili buorideapmin.

"Ain lea olu bargu"

Eurohpa ráđi áššedovdikomitea cealká, ahte vaikko Suoma eiseválddit leatge bargan vehádatgielaid gáhttema buorrin, de ain lea olu bargu ovddabealde.

Sámegielaid ektui áššedovdikomitea gávnnaha, ahte sihke davvisáme-, anáraš- ja nuortalašgiela dilli lea buorránan earret eará lassánan oahppomateriálaid ja giellabeassedoaimma dihte, muhto ovdamearkka dihte vejolašvuohta geavahit sámegiela dearvvasvuođa- ja sosiálabálvalusain lea ain hui heittot.

Komitea lea fuomášan váttisvuođaid maiddái sámegielat oahpaheaddjiid skuvlemis ja dihto doaimmaid bissovaš ruhtadeamis. Dáinna komitea čujuha earret eará eaktodáhtolaš skuvlejumiid ordnemii.

Komitea váillaha bissovaš ruhtadeami giellabargui

Eurohpa ráđi áššedovdikomitea ávžžuha Suoma earret eará ovddidit Giellagáldu-prošeavtta ovttas Norggain ja Ruoŧain, čujuhit bissovaš ruhtadeami sámegielaid ovddideapmái, nannet erenoamážit sámegielat ávnnasoahpaheaddjiid skuvlema ja bargagoahtit dan ovdii, ahte sámegielaid dovdamuš ja dohkkeheapmi lassána earret eará skuvlejumi ja media bokte.

Áššedovdikomitea fuopmášahttá, ahte dat duohtavuohta, ahte badjel 60 proseantta Suoma sápmelaččain ássá sámeguovllu olggobealde, váttásmahttá sámegielaid dili ovddideami erenoamážit skuvlejumis ja sosiála- ja dearvvasvuođabálvalusain. Komitea ávžžuhage Suoma stáhta nannet ja lasihit sámegielat oahpahusa maiddái sámiid ruovttuguovllu olggobealde. Dása komitea árvala čoavddusin bissovaš ruhtadeami giellabesiide ja rávesolbmuid skuvlejupmái.

Komitea ávžžuha Suoma maiddái bargagoahtit dan ovdii, ahte sámegielat sosiála- ja dearvvasvuođabálvalusat fitnašuvvet buorebut go dál.

Eurohpa Ráđi ministtarkomitea nanne vel maŋŋelappos loahpalaš ávžžuhusaid.

Varrasamosat: Sápmi

Váldoođđasat

Varrasamosat

Muualla Yle.fi:ssä