Sápmi |

Eurohpá rasismma ja utnohisvuođa vuostásaš kommišuvdna ávžžuha Suoma skuvllaid oahpahišgoahtit eanet sámiid birra

Eurohpá rasismma ja utnohisvuođa vuostásaš kommišuvdna lea addán Supmii 20 ávžžuhusa rasisma ja utnohisvuođa eastadanbargui.

gákti ja liidni
Govva: Vesa Toppari / Yle

Eurohpá rasismma ja utnohisvuođa vuostásaš kommišuvdna ECRI lea addán Supmii ávžžuhusaid rasisma ja utnohisvuođa eastadeapmái.

ECRI ávžžuha earret eará Suoma skuvllaid oahpahišgoahtit eanet sámiid birra. Kommišuvnna mielde sámekultuvrra dovdamuša galgá lasihit váldoservodagas. ECRI oaivvilda, ahte dat sáhtašii geahpedit vaššiságaid sámiid vuostá.

Kommišuvdna ávžžuha maiddái viiddidit ovttaveardásašvuođaáittardeaddji doaibmaválddi ja lasihit das resurssaid dásseárvoáittardeaddjái. Lassin rasisttalaš ja seksuálavehádagaide guoski vaššisáhkaváttisvuođa čoavdimii galgá dahkat sierra strategiija. Seammás maiddái láhkaeiseválddiid ja riektelágádusa skuvlejumi galggašii lasihit ja viiddidit vaššiságaid ja vašširihkkosiid oasil. ECRI ávžžuha Suoma maiddái addit doarvái ruhtadeami románapolitihkalaš prográmmii.

Ávžžuhusaide gullá maiddái sierra sorjjaskeahtes orgána vuođđudeapmi, mii dutkkašii nállevealahan- ja boleseiseváldi boasttugeavahus áššiid. Maiddái bolesfámuid bargoveahka galggašii leat seamma máŋgga bealát dego Suoma álbmotge lea, oaivvilda ECRI.

ECRI giitalii Suoma jo čađahuvvon buorádusain ja doaibmabijuin mat leat dál jođus. Seammás dat goit attii Supmii 20 ávžžuhusa rasisma ja utnohisvuođa eastadanbargui.

Eurohpa ráđi vuollásaš kommišuvdna ECRI almmustahtii ikte maŋŋebárgga viđát Suoma guoski raporttas. ECRI dárkkista maŋemustá guovtti jagi geahčen mo ávžžuhusat leat ollašuvvan.

Varrasamosat: Sápmi

Váldoođđasat

Varrasamosat

Muualla Yle.fi:ssä