Sápmi |

Eurohpa stuorámus golleruvke Gihttelis lea huksen 24 kilomehtera luoitinbohcci measta gárvvisin, vaikko ii leat vel lágalaš lohpi

Bázahusčáziid luoitimii bohcci mielde lea lohpi guovlohálddahusdoaimmahagas, muhto luonddusuodjalanbiire lea áigumin váidit lohpemearrádusas.

Suurikuusikon kaivoksen purkuputken rakennustyömaa Kittilässä.
Gihttela golleruvkke luoitinbohcci goaivunbarggut álge ođđajagimáus 2020. Govva: Jarmo Honkanen / Yle

Gihttela ruvkkes leat goivon govda linjá luoitinbohcci várás čađa jekkiid ja vuvddiid. Linnjá lea jo 24 kilomehtera guhkki ja 30 mehter govdat ja bohcci goivot njealji mehtera čiekŋalassii. Bálddas manná vel fuolahanluodda. Fitnodaga mielde bohcci huksen máksá 16 miljon euro.

Ruvkefitnodat Agnico Eagle Finland Oy lea goivon luoitinbohcci bázahusčáziid várás measta gárvvisin, vaikko dasa ii leat vel lágalaš biraslohpi. Fitnodagas lea easkka vuolimus dási lohpeeiseválddi Davvi-Suoma guovlohálddahusdoaimmahaga mieđihan lohpi bázahusčáziid luoitimii bohcci mielde.

Ruvkefitnodaga mielde bohcci goaivun lea dáhpáhuvvan eananoamasteaddjiid lobiin. Bohcci johttá golmma joga rastá ovdal go dat joavdá Ovnnesjoga oalgejohkii Loukinenii. Dát bohcci boahtá lasihit bázahusčázi meari Ovnnesjoga čázádahkii vel ovddežisge.

Suurikuusikon kultakaivoksen purkuputkea rakennetaan.
Ruvkefitnodaga goivon bohcci johttá golmma joga rastá ovdal go dat joavdá Ovnnesjoga oalgejohkii Loukinenii. Govva: Jarmo Honkanen / Yle

Bázahusčázit leat dagahan vahágiid čázádagaide

Dán rádjái badjel logi jagi áiggis gieđahallon bázahusčáziid leat luoitán ádjaga ja jeakki bokte Seurujohkii, mii golgá ruvkke bálddas. Dasa fitnodagas lea biraslohpi.

Ođđasamos biraslobis lea 438 siiddu, Davvi-Suoma guovlohálddahuseiseváldi attii dasa lobi miessemánus. Lobis eai boađe ovdan goit bázahusaid mearit.

Lohpebáhpáriin bohtet ovdan vahágat, maid ruvkedoaibma lea dagahan čázádagaide. Hávkkabázahusat leat lasihan šattolašvuođa Ovnnesjoga čázádagain. Ruvkke váikkuhusaid árvalit leat stuorát go Levi turismaguovddážis.

Video: median oletuskuva, musta laatikko

Ruvkefitnodat: buhtistanlágádussii áigot investeret logiid miljovnnaid

Ruvkefitnodat Agnico Eagle Suoma beaivválaš jođiheaddji Jani Lösönen muitala, ahte fitnodat áigu investeret logiid mijovnnaid euroid bázahusmeari geahpedeapmái. Fitnodaga lohpeohcamuša mielde buvttadeami lasihemiin ožžot ruđa birasinvesteremiidda.

Hávkkabuhtisteami vugiid áigot piloteret ovdal buhtistanlágádusa huksema.

– Hávkkabázahusaid oasil leat fuomásan šattolašvuođa lassáneami ja danin leatge čavgen lohpeeavttuid, maidda geahččalaš vástidit, dadjá Lösönen.

Luonddusuodjalanbiire áigu váidit áššis

Lappi luonddusuodjalanbiire doaimmajođiheaddji Mika Flöjt muitala, ahte sii áigot váidit lobis Vaasa hálddahusriektái. Luonddusuodjalanbiire mielde ruvkefitnodat lea bidjan lohpeeiseválddiid ja hálddahusrivttiid váttis dillái go lea goaivugoahtán bohcci ovdal lágalaš lobi dasa.

– Fitnodat geahččala vealtit dan, ahte dat ii hukse albma bázahusčáziid buhtistanrusttega mainna sáhtášii buhtistit buot vahátlaš ávdnasiid. Dat heajuda čázádaga ekologalaš dili, dát rihkku EU čáhcedirektiivva ja maiddái Ovnnesjoga erenomášlága ja Natura-doaimma, čuoččuha Flöjt.

Hálddahusrievtti duopmárat gártet dál árvvoštallat váidima gieđahaladettiin, ahte addetgo lobi measta gárvvisin goivojuvvon miljovnnaid euroid máksán luoitinbohccái.

Varrasamosat: Sápmi

Váldoođđasat

Varrasamosat

Muualla Yle.fi:ssä