Sápmi |

Eurovišuvnnat álget disdaga Tel Avivis – Luohti gullosta duorastaga

Eurovision lávlungilvvu nuppi oassefinálas duorastaga 16.5. gullo luohti, go norgalaš KEiiNO-joavku njuike lávddi ala.

KEiiNO
KEiiNO joavkku Tom Hugo Hermansen, Alexandra Rotan ja Fred Buljo. Govva: Andres Putting / Eurovision Song Contest

Eurovision Song Contest -lávlungilvu álgá odne 14.5. Tel Avivis, Israelis, go vuosttaš oassefinálá álgá diibmu 21.00. Lávlungilvu joatkašuvvá nuppi oassegilvvuiguin duorastaga 16.5. Dalle lávddi alde gullosta maiddái luohti, go Norgga sádden KEiiNO-joavku njuike lávddi ala. KEiiNOs lávluba Tom Hugo Hermansen ja Alexandra Rotan. Sudno lassin joavkkus juoigá guovdageaidnulaš Fred Buljo.

– Mun áiggun ovddastit sámi kultuvrra nu bures go sáhtán ja dieđusge mun sávan, ahte olles Eurohpa boahtá juoigat min mielde, dajai Buljo Yle Sápmái njukčamánus.

Maiddái Buljo áhčči, Klemet Anders Buljo lea vuolgán bártnis doarjjan Tel Avivii. Sus leatge stuorra vuordámušat KEiiNO birgema ektui.

– Mun lean áibbas sihkkar, ahte dat boahtá finálii. Ii eahpádusge.

Guldal dás Klemet Anders Buljo jearahallama disdaga 14.5. Buorre iđit Sápmi -sáddagis. Doaimmaheaddjin Jaana Kynkäänniemi. Jietna: Yle Areena.

Vuosttáš oassefinálas loaiddastit oktiibuot 17 riika. Ovdamearkka dihte Suopma gilvvohallá vuosttaš oassefinálas. Buot vuosttaš oassefinála riikkaid gávnnat dáppe.

Nuppi oassefinálas lea okta oassálasti riika eanet go vuosttaš oassefinálas, dasgo álgoálggus vuosttaš oassefinálii biddjon Ukraina geassádii gilvvuin. Nuppi oassefinála oasseváldiid gávnnat dáppe.

Goappáge oassefinálas besset viidásabbot 10 riika álbmoga jienaid ja riikkaidgaskasaš áššedovdijuryid addin čuoggáid vuođul.

Lávlungilvvu finála ordnejuvvo lávvardaga 18.5. diibmu 21.00. Oassefinálain birgen riikkaid lassin finálas oaidnit ordnejeaddjiriika Israel, ja gilvvu vihtta stuorra ruhtadeaddjiriika nappo Fránska, Duiska, Itália, Espánnja ja Britannia. Lávvardaga vuoittus leat gilvaleamen oktiibuot 26 riikka.

Varrasamosat: Sápmi

Váldoođđasat

Varrasamosat

Muualla Yle.fi:ssä