Sápmi |

Evttohus giellaealáskahttinprográmman lea gárvvis

Evttohus sámegiela ealáskahttinprográmman lea válbmanan. Evttohus geigejuvvui bearjadaga diibmu 11.30 oahpahusministtar Jukka Gustafssonii ja kultur- ja valáštallanministtar Paavo Arhinmäkii.

Govva: Yle Sápmi

Sámegiela ealáskahttinprográmma lea válmmaštallan bargojoavku, man oahpahus- ja kulturministeriija lea ásahan. Bargojoavku galggai árvvoštallat sámegielaid dili ja doaimmaid, mat dili ovdii leat dahkkon. Bargojoavku galggai maid evttohit vugiid, maiguin sámegielaid sáhttá ealáskahttit.

Bargojoavkku mielde sámegielaid ealáskahttima ovdii leat bargan olu maŋimuš jagiid, muhto dat doaimmat eai vuos dáhkit gielaid seailuma. Buot Suoma golbma sámegiela, erenoamážit nuortalaš- ja anárašgiella, leat ain áitojuvvon.

Bargojoavkku mielas stuorámus hástalusat leat sámegiela ja sámegielat oahpahusa ja beaivedivššu sihkkarastin, sápmelaččaid eretfárren sámiid ruovttuguovllus, sámegielaid lunddolaš giellageavahanbirrasiid geahppáneapmi ja dat, go iešguđet surggiin leat nu unnán bargit, geat leat seamma áigge gelbbolaččat bargui ja máhttet doarvái bures sámegiela.

Ovcci gáibádusa

Bargojoavku hábmii ovcci gáibádusa, maidda galgá bidjat deattu sámegielaid ealáskahttimis:

1) Giellabeassedoaimma galgá viiddidit ja stáđásmahttit, ja beaivedivššu fállat dego lágas gáibiduvvo

2) Sámegielaid oahpahusa galgá ovddidit olles riikkas, ja ávkkástallat oahpahusas maid gáiddusoktavuođaid

3) Skuvlenvuogádat galgá buvttadit ain eanet sámegielat ámmátolbmuid erenoamážit oahpahan- ja áššehasbálvalanbargguide

4) Nuortalašgiela galgá ealáskahttit erenoamáš doaimmaiguin, vai giela geavaheapmi ja oahpahus lassána

5) Sámi giellaláhka galgá ollašuvvat dievaslaččat sámiid ruovttuguovllus, ja eiseválddit ovddidit aktiivvalaččat sámegiela geavaheami

6) Sámegielat radio-, tv- ja neahttamateriála galgá sakka lasihit

7) Sámegiela dikšuma, vurkema ja dutkama galgá ovddidit, ja dutkanbohtosat ja -materiálat galget leat álkket ávkkástallamis

8) Sámedáidaga ja kultuvrra doarjaga galgá lasihit

9) Ovttasbargu, mainna dorjot sámegiela ja kultuvrra rájáid rastá, galgá stáđásmuvvat. Ovttasbargguin galgá hukset nana sámegielat birrasiid

Bargojoavkkus leamaš mielde earret eará oahpahus- ja kulturministeriija, vuoigatvuohtaministeriija, sámedikki ja Lappi guovlohálddahusa ovddasteaddjit.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä