Sää´mjânnam |

Feodoroff alttâd pueʹrin miõlin ouddooumžen: "Ij vueiʹt ǩiõttvaaulin altteed tuâj"

Saaʹmi ouddooumaž vaalin puõđi juʹn kõskkmieʹrrõs rosttvid mâŋŋa. Veikko Feodoroff mieʹldd saaʹmi ouddoummu feʹrttai seämmast tuâjškueʹtted nuõrttsäʹmmlai aaʹššivuiʹm.

Veikko feodoroff
Tâʹvv-Lääʹddjânnam vaaldšemvuõiggâz mieʹrrõõzz mieʹldd Veikko Feodoroff tuåimm saaʹmi ouddooumžen eeʹjj vaaʹjjtõõzzâst. Govva: Vesa Toppari / Yle Sápmi

Saaʹmi ouddooumaž vaalin puõđi juʹn kõskkmieʹrrõs rosttvid mâŋŋa. Tâʹvv-Lääʹddjânnam vaaldšemvuõiggâz mieʹrrõõzz mieʹldd Veikko Feodoroff tuåimm saaʹmi ouddooumžen eeʹjj vaaʹjjtõõzzâst.

Veikko Feodoroff alttâd suu tuâjast pueʹrin miõlin.

– Pueʹrr miõlin, ko nääiʹt ooʹri mõõni, nuʹt mäʹhtt vaal-luʹvddkåʹdd leäi mieʹrrääm, mušttal Feodoroff.

Vaaldšemvuõiǥâs heelǥii tiuʹddepiijjmõõžž ǩeâlddmõõžž kuõskki kaibbtõõzz. Vaaldšemvuõiǥâs oudd veâl vaiddlõsäšša mieʹrrõõzz mâʹŋŋlest, leâša kuuitâǥ ođđ ouddoummu feʹrttai tuâjškueʹtted säʹmmlai aaʹššivuiʹm juʹn tâʹlles.

– Kâʹl-han täʹst feʹrttai äʹlǧǧed tuejjeed, ij vueiʹt ǩiõttvaaulin vueʹlǧǧed tuõjju ko ääʹšš kuuitâǥ lie. Âlgg väʹldded čiõlgg, koʹst ââʹn leäʹp mõõnnmen da mõõk ääʹšš meeʹst lie ǩirâsõmâs pueʹttmen, aainâs tõʹst juʹn måtam ceälkkmõõžž juʹn lie. Tõid âlgg juʹn tâʹlles valmštõõllâd.

– Vuõssân ko vaajtâʹlle, feʹrttai vuõssmõs såbbar ââʹnet jåttlânji ââʹnned, nuʹt vueiʹttep sääʹmsuåvtõõzzid vaʹlljeet nuʹt vueiʹttep mij saaʹmi aaʹššid ooudâs viikkâd.

Vaal-luʹvddkååʹdd saaǥǥtuõʹlljeei toođvaž kõskkmieʹrrõʹsse

Vaauʹvvkååʹdd saaǥǥtuõʹlljeei Hanna-Maaria Kiprianoff lij toođvaž Tâʹvv-Lääʹddjânnam kõskkmieʹrrõʹsse.

Kiprianoff åskk, što loopplaž mieʹrrõs puätt še jåttlânji.

Hanna-Maaria Kiprianoff
Hanna-Maaria Kiprianoff Govva: Sara Wesslin / Yle

– Nuʹt-han tõt õõlǥči-ki mõõnnâd. Mij leäʹp tuejjääm nåkkam mieʹrrõõzz vaali da ââʹn Tâʹvv-Lääʹddjânnam lij tuejjääm nuʹt. Tõt lij pâi kõskkmeärrõs, täʹst-han puätt loppmeärrõs, ko puätt. Kâʹl mon joordam, što sij ǩiččlâʹtte mieʹrreed tän ääʹšš pirr jåttlânji.

Yle Sääʹmjânnam leäi tän ääʹšš vääras še mainstâʹttam Tanja Sanila, leâša son ij haaʹlääm veâl kommentâʹstted ääʹšš.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä