Sápmi |

Feodoroff, Pieski ja Helander Nordea-báŋkku ovddabealde: “Nordea, heaitte duolbmamis olmmošvuoigatvuođaid”

Sámi dáiddárat Outi Pieski, Marja Helander ja Pauliina Feodoroff gáibidit Nordea-báŋkku geassádit ruhtadeamis Dakota Access Pipeline -oljobohcci, man báikkálaš álgoálbmogat vuosttildit.

Feodoroff, Pieski ja Helander Nordea-báŋkku ovddabealde
Govva: Priváhta / Pauliina Feodoroff

Sámi dáiddárat Outi Pieski, Marja Helander ja Pauliina Feodoroff leat ovttas birassearvvi Greenpeacein mannan otne Nordea-báŋkku ovddabeallái čajehit miela Helssegis. Miellačájeheamis mielde lei maiddái City-Sámit -searvvi lahttu Juho Keva.

Dáiddárat gáibidit Nordea-báŋkku geassádit ruhtadeamis Dakota Access Pipeline -oljobohcci, man báikkálaš álgoálbmogat vuosttildit.

– Nordea, heaitte duolbmamis olmmošvuoigatvuođaid, čuožžu galbbas man Marja Helander doallá almmolaš Facebook-govas.

Nordea lea investeren 360 miljon ruvnnu, nappo sullii 35 miljon euro, fitnodagaide mat oassalastet Dakota Access Pipeline -prošektii.

Davvi-Dakotas, Amerihkás leat ain jođus dáistaleamit Dakota Access Pipeline -oljobohcci huksema vuostá.

Bohcci galgá huksejuvvot báikkálaš reserváhta váldočáhcegálddu vuolil.

“Čázi suodjáleaddjit” badjel 500 čearddas leat boahtán Standing Rockii vuosttildit bohcci huksema.

Varrasamosat: Sápmi

Váldoođđasat

Varrasamosat

Muualla Yle.fi:ssä