Sápmi |

Ferte vuojehit vuos stáhta čorraga eret vai beassá iežas ealu biebmat – Áŋŋelis valjis ealggat

Áŋŋelis leat dál nu olu ealggat, ahte dat leat giksin báikki olbmuide. Boazodoalli lea hárdašuvvan go ealggat borret su suinniid ja barggahit su. Son háliidivčče sierrabivdolobi šilljoealggaide.

Arvi Torikka
Govva: Anneli Lappalainen/ Yle

Ovdal go oba čuvggoda, de áŋŋellaš boazodoalli Arvi Torikka ferte stáhta čorraga huhccalit eret vai bálle ráfis iežas ealuinis.

– Gártá iđđes ain skohtera bidjat johtui ja vuodjelit eret daid ovdalgo beassá biebmat dáid bohccuid. Máŋgii lea mannan dan láhkai, ahte go lean biebman, dat leat dan botta jo boahtán dat ealggat ruovttoluotta, muitala Torikka.

Bolesii dahkkon almmuhus ealggain

Anárjotleagis lea dál nu valjis ealga, ahte olbmot ballet dain ja Arvi lea gártan dahkat dain polesii almmuhusa.

Lappi bolesis nannejit, ahte sidjiide lea boahtán almmuhus Áŋŋela ealggain. Bolesat bivde fuođđogáhttensearvvi fitnat baldimen ealggaid eret, ja nu sii fitnege, muhto Torikka mielde ii mannan guhká go ealggat jorggehedje ja máhcce fas šiljuide.

Arvi Torikka suoidnespáppaid luhtte
Govva: Anneli Lappalainen / Yle

Guovtte jándoris borret suoidnespáppa – šaddá divrrasin biepmat ealggaid

Torikka lea ieš láddjen alcces dálvvi várás suinniid. Dál iđit eahket oaidná mo ealggat borret lána vánibun. Okta suoidnespábba ii bistte guhká.

– Ovtta suoidnespáppa siste lea suoidni 600-700 kilo ja dat guovtte jándoris borret dat ealggat ovtta spáppa. Dat leat guđas gávcci elgii, ja dat go ija čužžot das, de dat lea iđđes viehka guorus dat spábba, šuohkiha Torikka.

Dego kaleandara dovddašedje, bivdoáiggi maŋŋá njolggistit Áŋŋelii

Áŋŋel lea ealggaid dálveguohtuneana ja deike bohtet dálvái ealggat Norgga bealdege. Ealggat orrot dovdamin kaleandara go dalán bivdoáiggi maŋŋá ihtet Áŋŋelii.

Torikka háliidivčče šilljoealggaide sierrabivdolobi.

–Gal dat galggašii sáhttit oažžut sierralobi šilljoealggaide. Mun lean geahččalange dan, muhto ii leat gullon mihkkige.

Áŋŋel ealggat livadeamin
Govva: Anneli Lappalainen / Yle

Sierrabivdolohpi vejolaš, muhto ii automáhtalaš

Fuođđogáhttensearvi fas muittuha, ahte áli ovddemužžan ferte viggat vuojehit ealggaid eret dáluid luhtte.

Sierralobi sáhttá ohcat fuođđoguovddážis, ággan ferte leat dat mo ealggat áitet olbmo heakka dahje opmodaga.

Jođánis čoavddus dillái ii oro leamen, dassái go čoavddus gávdno, Arvi ferte beare gamus dovdat leago boazoáiddis sealgge duohken lojes boazu vai vel lojit ealga.

Varrasamosat: Sápmi

Váldoođđasat

Varrasamosat

Muualla Yle.fi:ssä