Sápmi |

"Festiválain birge measta beare movttegis mielain, iige gánnet menddo olu plánet" – Sámi festiválageassi loahpa guvlui

Teija Kaartokallio sávašii Suoma beale sámefestiválaide maid lávostallanvieru.

Teija Kaartokallio
Teija Kaartokallio mielas dehálamos lea albma festivála miella. Govva: Taija Hietanen

Dán geasi festiválageassi álgá leat loahpageahčen, muhto ain leat muhtin sámefeasttat.

Ohcejohkalaš Teija Kaartokallio beasai dán gease vuosttas geardde Riddu Riđđu -festiválii. Son lei ráhkkanan festiválii vuolgimii ja sus lei muhtinlágan nu gohčoduvvon check-list, muhto dego dávjá geavvá, álo ii mana plánaid mielde.

– Munhan gal ledjen plánen maid válddán fárrui ja man gávtti áiggun coggat, muhto dat gal manai nu, ahte diibmobeale ovdal go vulgen, plánat fas rivde, boagusta Kaartokallio.

"Livčče somá, jus Suoma beallái boađášii lávostallanvierru"

Teija Kaartokallio ii astta vuolgit Márkomennui dán vahkkoloahpa, muhto Ijahis Idja -festivála Anáris lea áinnas dakkár, gosa lea baggu beassat.

Son rávvege, ahte dál maŋimuštá gánneha ohcat idjadansaji, jus áiggoš boahtit Ijahis Idjii. Eará gal ii nu dárkilit gánnet vuos plánet.

– Idjadansaji gánneha čielggadit áiggil, in dieđe dárbbašago nu erenomážit ráhkkanit. Dalle go ii menddo olu pláne, de dalle šaddá gal somá álo, beassá báifáhkka bargat buotlágan áššiid. Buot dehálamos lea boahtit báikki ala, lohká Kaartokallio.

Riddu Riđđus Kaartokallio idjadii skihpáriinnis lávus, ja sávváge, ahte maiddái Suoma beale sámefeasttaide boađášii lávostallanvierru.

– Livčče hui somá jus deikke maid boađášii dakkár camping-guovlu, gos sáhttá idjadit lávus dahje tealttás. Dat atmosfeara lea goittotge vehá earálágan, go olbmot leat doppe ovttas.

Teija Kaartokallio jearahallama sáhtát guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä