Sápmi |

Finavia luobahii Heahtá girdigietti gildii – girdigietti beaivválaš jođiheaddji muitala gávppálaš girdimiid álgit skábmamánus

Eanodaga girdigietti beaivválaš jođiheaddji ja hoavda Marko Halla muitala ahte gávppálaš girdimiid leat várren jo skábmamánus gitta guovvamánu rádjái.

Marko Halla
Eanodaga girdigietti beaivválaš jođiheaddji ja girdigietti hoavda Marko Halla dadjá, ahte sii eai bala garra barggus man girdigietti dagaha. Govva: Marianne Ketola / Yle

Eanodaga girdigietti hálddahuslaš nuppástus lea dál dáhpáhuvvan, go soahpamušaid girdigietti luobaheamis vuolláičálle gaskavahkku 14.7. Luobaheamis girdigieddi sirdása girdigieddefitnodat Finavias Eanodaga gieldda oamastan oasussearvái. Luobaheapmi dáhpáhuvvá virggálaččat odne duorastaga 15.7.

Eanodaga girdigietti beaivválaš jođiheaddji ja girdigietti hoavda Marko Halla muitala, ahte girdigietti lohpeproseassaid leat álggahan jo buriin áiggiin girdigietti luobahanproseassa áigge. Ulbmilin leage oažžut girdigietti válmmašvuhtii nu jođánit go vejolaš.

Gávppálaš girdimiidda girdigietti lea gárvvis skábmamánus, ja girdimiid leatge várren jo skábmamánus gitta guovvamánnui, muitala Halla.

– Girdigietti boahtá leat gearggus daidda hástalusaide ja dan áigetávvalii. Dát luopmojohtolat lea min váldoulbmil ja mis ii leat mihkkege sivaid jáhkkit manin dat ii lihkostuvašii. Dat boahtá lihkostuvvat ja dát boahtá doaibmat skábmamánus.

Beaivválaš jođiheaddji ii bala garra barggus

Marko Halla dadjá girdigietti ulbmilin leat dahkat vejolažžan johtolaga, vai mátkeealáhus bastá doaibmat Eanodagas.

– Mii leat dat vejolažžan dahkki, ja min ulbmilin lea doaibmat boađusvásttolaččat ja oažžut vuos dán johtui iešbirgejeaddjin ja dan maŋŋá nu, ahte dat buvttada.

Hálddahuslaš nuppástus lea jo dáhpáhuvvan, muhto áigumuš lea ordnet maŋŋelappos maiddái gieldalaččaide dilálašvuođa gullat plánaid birra, muitala Halla.

– Dasto go mii beassat ovddos guvlui dán lohpeproseassas ja áššehasvuođain, dasto mis lea sivva ávvudit. Sihkkarit dieđihit ja addit gieldalaččaide vejolašvuođa boahtit mielde. Iihan dát boađe leat dušše ávvudeapmi, dát lea garra bargu, muhto dashan mii eat bala, loahpaha Halla.

Enontekiön lentokenttä
Eanodaga girdigiettis ii leat leamaš dábálaš ruvttojohtolat golmma jahkái. Govva: Annu Passoja / Yle

Eanodaga girdigieddi oaččui geassemánu loahpas 400 000 euro stáhtadoarjaga doaibma- ja investerengoluide jahkái 2021. Halla muitalii dálle, ahte doarjaga geavahit girdigietti doaimma johtui bidjamii, ovddideapmái ja dorvvasteapmái. Dat sisttisdoallá bargoveaga bálkkáheami ja skuvlema sihke operatiivvalaš doaimmaid ovddideami.

Girdigietti vuovdin ságastahttii olu maiddái gielddaválggaevttohasaid, ja leige ovdamearkan oktan sivvan manin muhtin evttohasat Eanodaga Guovddášbellodagas guđđe bellodaga válgalisttu.

Eanodaga gielda mearridii Eanodaga girdigietti ja dan fitnodatdoaimma oastimis girdigieddefitnodat Finavias skábmamánus 2020. Gávppi haddi lei sullii 600 000 euro.

Varrasamosat: Sápmi

Váldoođđasat

Varrasamosat

Muualla Yle.fi:ssä