Sápmi |

Finnair girdigoahtá fas Avvilii vihtta vuoru vahkus – mátkeealáhusa ovttasbargoorgána: "Lea hui dehálaš, ahte girdimat fas álget"

Finnair girdigoahtá Helssega ja Avvila gaskka fas sotnabeaivvi rájes. Inari-Saariselkä Matkailu Oy beaivválaš jođiheaddji Marja Kumpuniemi muitala, ahte olbmot leat váillahan girdijohtolaga Avvilii.

Inari-Saariselkä Matkailu Oy márkanastinhoavda Marja Kumpuniemi
Inari-Saariselkä Matkailu Oy beaivválaš jođiheaddji Marja Kumpuniemi. Govva: Priváhta.

Avvila girdigiettis lea dán gease leamašan jaskat, muhto dán vahku sotnabeaivvi rájes girdigieddi veháš ealáska, go girdifitnodat Finnair girdigoahtá fas Avvilii.

Girdimat Helssegis Avvilii álget sotnabeaivve 2.8. Avvilis vuolggedettiin girdet Gihttela bokte Helssegii.

– Diibmá dán gaskka girde juohke beaivve, dál vihtta vuoru vahkus, muitala Mari Rouvi Finnair dieđiheamis.

Finnair plánan lei vuos girdit Avvila ja Helssega gaskka njeallje geardde vahkus, muhto Davvi-Suopma lea mátkkoštanbáikin dan veardde geasuheaddji, ahte sii mearridedje girdit vihtta háve vahkus, muitala Rouvi.

Finnair girdá Helssegis Avvilii ja nuppegežiid mánnodagaid, disdagaid, duorastagaid, bearjadagaid ja sotnabeivviid.

Koronavirusdili dihte fitnodat lea girdán giđa ja geasi áigge Lappi girdigittiin dušše Roavvenjárgii. Avvilii Finnair lea girdán maŋimuš njukčamánu loahpas.

Girdijohtolagas mearkkašupmi guovllu turismii

Girdijohtolaga nohkan lea oidnon maiddái guovllu mátkeealáhusas, muitala mátkeealáhusa ovttasbargoorgána Inari-Saariselkä Matkailu Oy beaivválaš jođiheaddji Marja Kumpuniemi.

Guvlui bohtet dábálaččat olu mátkkošteaddjit girdiin, ja guvlui lea dehálaš leat olámuttus, son joatká.

Maŋimus jagiid áigge guovllu mátkkošteami lassáneapmi lea dáhpáhuvvan girdijohtolaga bokte.

– Idjadeamit lassánedje diibmá geasset 8 proseanttain, mii manai oktii girdijohtolaga lassánemiin. Nappo gal das lea mearkkašupmi guvlui.

Olbmot gávdnán guvlui maiddái girdijohtolaga haga

Marja Kumpuniemi muitala, ahte geassit suopmelaš mátkkošteaddjit bohtet guvlui maiddái eará vugiiguin go girdiin, muhto girdin lea álkes vuohki eandalii olgoriikalaš mátkkošteaddjiide ja sidjiide, geat eai leat guovllus vel fitnan.

– Girdiin lea álki boahtit, girdit Avvilii ja dies de mátkkoštit viidáset guovllus.

Kumpuniemi goittotge illuda go lea fuomášan, ahte olbmot leat gávdnan guvlui girdijohtolaga váilumis fuolakeahttá.

– Máŋggat mátkkošteaddjit bohtet biillain dahje leat girdán dahje boahtán togain Roavvenjárgii, ja joatkán das de bussiin Anára ja Suoločielggi guvlui.

Olbmot leat dattetge váillahan girdijohtolaga Avvilii, dadjá Kumpuniemi.

– Gal dat lea hui dehálaš, ahte girdivuorut fas álget, ja sihkkarit dat váikkuha mátkkošteapmái. Máŋggat geat mátkkoštit geasset dahje ruškki áigge, sáhttet girdit Avvilii ja johtit dies viidáset juogo láigobiillain dahje almmolaš johtolagain.

Varrasamosat: Sápmi

Váldoođđasat

Varrasamosat

Muualla Yle.fi:ssä