Sápmi |

Fuolkkit illudedje, go soga stuorra bárdni nákkáhalai

Filosofiija lisensiáhta Lemet Näkkäläjärvi nákkosgirji Jávrrešduoddara badjedilis dárkkistuvvui mannan bearjadaga Oulu universitehtas. Sihke varas doavttir ja su fuolkkit ledje ilus, go badjel logi jagi bistán bargu viimmat gárvánii.

Iŋggá-Sárá-Ingá, Inker Maria Näkkäläjärvi
86-jahkásaš Iŋggá-Sárá-Ingá, Inker Maria Näkkäläjärvi čuovui bártnis nákkosdilálašvuođa. Govva: Vesa Toppari / Yle

Juvvá Lemet, Klemetti Näkkäläjärvi nákkáhalai filosofiija doavttirin mannan bearjadaga Oulu universitehtas. Näkkäläjärvi lea dutkan nákkosgirjjistis Jávrrešduoddara badjedili sihke kultuvrralaš gárggiideami ja diehtovuogádaga Näkkela bálgosa davvioasis jagiin 1930-1995.

"Ii dán gal livčče ovdaláigge jáhkkán"

Varas doaktára 86-jahkásaš eadni Iŋggá-Sárá-Ingá, Inker Maria Näkkäläjärvi lea ilus, go bárdni oaččui barggus gárvvisin. Son mieđiha, ahte ii livčče jáhkkán dákkár beaivvi boahtit.

- Gal dat ligge dieđusge. Nie stuorra hearrá bođii, ii dan gal livčče ovdaláigge jáhkkán, dadjá eadni.

Ovtto ii goittotge leat leamašan nu álki dat skuvlabálggis. Eadni goit oinnii, ahte su bárdni lea viššal lohkat ja juksá vel juoidá.

- Das dat vulggii, go daid uhca girjjážiid logai. Gal dat muhtimin manai heajut maid skuvllas, muhto ii dat heaitán goittot, manai fal ovddosguvlui, muittaša Iŋggá-Sárá-Ingá.

Nákkosdilálašvuhtii ledje olu fuolkkit čoahkkanan. Juvvá-Lemeha oarpmealli, oahpaheaddji Maarit Magga vuordá gealdagasas, ahte beassá oaidnit nákkosgirjji.

- Mu mielas gal leat hui miellagiddevaččat justa dat kultuvrralaš áššit, maid Lemet lea dutkan, dego dat mearkavuogádat. Dat boahtá dieđusge hui lahka, go girji lea min guovllus ja doppe leat oahpes olbmot ja oahpes guovllut. Dat lea mu mánnávuođa báiki diet Jávrrešduottar, muitala Magga.

Dutkanbargu bisttii logi jagi

Näkkäläjärvi lea dutkan nákkosgirjjistis iežas ruoktoguovllu, Näkkela boazodili Jávrrešduoddara guovllus Davvi-Eanodagas. Son lea guorahallan bálgosa dili, sihke ieš ealáhusa ja kultuvrralaš beliid. Varas doavttir lea duhtavaš, go badjel logi jagi bistán bargu lea dál gárvvis.

- Gal mun lean aivve duhtavaš. Dát lea dakkár ášši, mii lea váivvidan dieđe man guhká. Dát lea leamaš badjel logi jagi dakkár dutkanprošeakta ja dál lean ožžon dan geahčái, illuda Näkkäläjärvi.

Varrasamosat: Sápmi

Váldoođđasat

Varrasamosat

Muualla Yle.fi:ssä