Sápmi |

Gabba lea sámi homoseksuálaid ođđa searvi – "Ulbmilin ahte sámi bonjut sáhttet eallit rahpasit Sámis"

Sápmi Prides mannan vahkoloahpa vuođđuduvvui ođđa searvi sámi HLBTIQ-olbmuide. Searvvi namma lea Gabba ja dat čujuha dasa, ahte sámit atnet gappaid hui fiidnán ja erenoamažin.

Jietna: Guldal Dávvet Bruun-Solbakk jearahallama vuossárgga Buorre iđit Sápmi -sáddagis (álgá áiggis 1:03:00)

Sápmi Pride -dáhpáhusas mannan vahkoloahpa vuođđuduvvui ođđa sámi homoseksuálaid searvi.

Searvvi namma lea Gabba ja dat čujuha dasa, ahte sámit atnet gáppaid hui fiidnán ja erenoamažin.

Sápmi Pride 2016
Govva: Pirita Näkkäläjärvi / Yle

– Mii hálidit bargat dan ovdii, ahte sámi bonjut sáhttet eallit Sámis rahpasit ja ahte dustet ja lea álkit maid leat rabas sámi bonju. Mii leat vuosttažettiin dan ovdii maid bargamin, muitala searvvi ságadoalli Dávvet Bruun-Solbakk.

Dávvet Bruun-Solbakk ságadoallin

Dávvet Bruun-Solbakk nammaduvvui ovttamielalaččat Gappa ságadoallin. Nubbin jođiheaddjin válljejuvvui ovttamielalaččat Leammuid Lemet Ánde, Lemet Ánde Stueng.

Dávvet Bruun-Solbakk lei maid okta váldolágideaddjiin dán jagi Sápmi Pride -dáhpáhusas, mii lágiduvvui Guovdageainnus.

Sápmi Pride -panelaságastallamis lávvardaga (video) bođii ovdan earret eará, ahte máŋggat sámi HLBTIQ-olbmot gártet doaladumiid dihte fárret Mátta-Norgii, -Ruŧŧii ja -Supmii.

Dávvet Bruun-Solbakk, Sápmi Pride 2016
Govva: Martta Alajärvi / Yle
– Ođđa searvvi višuvdna lea dieđus leat oidnosis sámi servodagas, ahte galgat hui aktiivalaččat maid buktit evttohusaid dahje cealkámušaid sámi servodahkii ja sámi almmolaš ásahusaide das, mo mii sámi bonjut hálidivččiimet ovddidit servodaga, Bruun-Solbakk muitala.

HLBTIQ
Govva: Yle Kioski
HLBTIQ dárkkuha homo-, lesbo-, bi-, trans-, inter- ja queer-olbmuid. Queer-olbmuin geavahuvvo sámegillii sátni bonju.

Stivrras ii vel oktage Suomas

Gabba-searvi vuođđuduvvui danin, go Queer Sámit -searvi heaittijuvvui dán gease.

Queer Sámit-searvi vuođđuduvvui vuostta Sápmi Pride -oktavuođas Gironis jagis 2014.

Gabba-searvvi stivrras galget boahtteáiggis ovddasteaddjit Norgga, Ruoŧa ja Suoma bealde, muhto dál stivrras ii leat vel oktage Suoma bealde.

NRK Sápmi: Paneladigaštallan Sámi Pride doaluin (video)

Yle Areena: Video Sápmi Pride -ráidovázzimis  

Varrasamosat: Sápmi

Váldoođđasat

Varrasamosat

Muualla Yle.fi:ssä