Sápmi

Gájanas-joavku bođii nubbin Sámi Grand Prix -lávlungilvvus

Gilvvu vuittii deatnulaš Ella Marie H. Isaksen bihtáin "Luoddaearru".

Hilda Länsman
Govva: Yle

Ohcejohkalaš ja anárlaš Gájanas-joavku bođii nubbin Sámi Grand Prix -gilvvu lávlunoasis beassášlávvardaga Guovdageainnus.

Joavkku lávlu Hilda Länsman lea duđavaš vásáhussii ja mieđiha, ahte kei veháš gealdagasas ovdal gilvvu.

– Lei duođaid gelddolaš, ja eandalii go leat sámit geahččamin nu das boahtá extra gelddolaš!

Gilvvu vuittii deatnulaš Ella Marie H. Isaksen bihtáin "Luoddaearru".

Vuosttas háve go Gájanas oassálastii Sámi Grand Prix -gilvui

Joavkkus čuojahit Länsmana lassin anárlaš musihkkarat Kevin Francett, Nicholas Francett ja Erkki Feodoroff.

Gájanas čuojaha musihka, mas ovttastuvvet luohti ja progressiivvalaš rock. Joavku lea čuojahan ovttas jagi 2013 rájes, muhto ovdal dán namain Out of the Woods.

Hilda Länsman muitala, ahte boahttevuođas Gájanas lea plánemin dahkat maiddái cd-skearru.

– Mii leat hállan dan birra, ahte gánske sáhtášii dakkár unna skearru ráhkadastit.

– Mun jáhkán, ahte dat Sámi Grand Prix lea buorre arena boahtit vehá oidnosii ja ahte earátge dáppe davvin dihtet ahte makkár joavkkut Sámis leat.

Juoigangilvvu vuittii mázelaš Johan Ivvár Gaup

Sámi Grand Prix -juoiganoasi vuittii mázelaš Johan Ivvár Gaup. 

Suoma bealde gilvui oassálasttiiga vuohččulaš Mathis Ole Vars ja anárlaš Neeta Jääskö.

Dán jagi Sámi Grand Prix -gilvvus gulluige vuosttas háve anáraš livđe, go Neeta Jääskö livđui iežas oappá. Vaikke livđe ii boahtánge áibbas vuosttas sadjái, lei vásáhus buorre.

– Hirbmat buorre vásáhus, dákkárat galggašedje eanetge!

Jääskö sávašii, ahte maid Suoma beal Sámis lágidivčče sierralágan juoigangilvvuid, vai olbmot movttáskivčče juoigat eambbo almmolaččat.

Varrasamosat: Sápmi

Váldoođđasat

Varrasamosat

Muualla Yle.fi:ssä