Koe uusi yle.fi
Sápmi |

Gájanas čuojaha guktii dán vahkus Kaustisis – "Dat lea gal hirbmat, hirbmat stuorra gudni"

Gájanas-joavku lea Jagi musihkkajoavku 2017 Kaustinen álbmotmusihkkafestiválas, mii álgá vuossárgga. – Mii leat garrasit hárjehallan dasa, nu mun jáhkán dat boahtá mannat oalle bures, lohká Hildá Länsman.

Gájanas-joavku lea Jagi musihkkajoavku 2017 Kaustinen álbmotmusihkkafestiválas Video: Yle Sápmi

Gájanas-joavku lea Jagi musihkkajoavku 2017 Kaustinen álbmotmusihkkafestiválas, mii álgá vuossárgga ja bistá olles vahku.

Gájanas ovdanbuktá guktii dán vahkus álbmotmusihkkafestiválas Kaustinen gielddas Gaska-Bađaeatnamis, maŋŋebárgga 11.7. ja gaskavahku 12.7.

– Dat lea gal hirbmat, hirbmat stuorra gudni, ahte náge ođđa joavku beassá dohko ovddastit sápmelaččaid, lohká joavkku lávlu Hildá Länsman.

Joavku lea hárjehallan garrasit dehálaš vahku várás ja loaiddastan guktii dán gease.

– Mii leat garrasit hárjehallan dasa, nu mun jáhkán dat boahtá mannat oalle bures, muhto gal dat lea hui somá beassat oaidnit, ahte makkár lea Suoma stuorámus álbmotmusihkkafestivála, go eat leat ovdal doppe fitnan, joatká Länsman.

“Lea oalle sihkkaris dovdu”

Maiddái Erkki Feodoroff lea luohttevaš, ahte buot manná bures.

– Juste dál in leat gealdagasas, mii leat goittotge beassan juo guktii čuojahit dán gease, ahte dat lea goittotge vehá veahkehan.

– Mii leat measta beaivválaččat hárjehallan ovtta mánotbaji áigge, lea oalle sihkkaris dovdu, Feodoroff dadjá.

Hilda Länsman Gájanas
Govva: Juha Länsman

Dasa, mo joavku lea ožžon nammadeami festivála dán jagáš musihkkajoavkun, ii máhtán Feodoroff vástidit. Länsman jáhkká gii nu lea fuobmán sin konsearttas ja bidjan sáni leavvat.

Joavkku musihkka lea rock-stiila, muhto das gullo čielgasit goit sámemusihka váikkuhusat. Länsman govvida dan maid máilmmemusihkkan dahje etnihkalaš musihkkan.

“Mun jáhkán, ahte olbmot liikojit dása!”

Joavkkus čuojaheaba maid Francetta vieljažat Kevin ja Nicholas. Soai vuordiba festivála iluin, vaikke vehá gealdagasas.

– Duođai buriin mielain vuolgit dieđusge, lea gal speanta, muhto dat lea oassi das, Kevin čaibmá.

Gájanas
Govva: Tarmo Lehtosalo

Nicholas fas lohká vel, ahte sus lea nana jáhkku dasa, ahte olbmot liikojit sin musihkkii. 

– Gal mun jáhkán, ahte olbmot liikojit min musihkkii. Mu mielas min musihkka ii leat mihkkege máilmme apmasamos, ahte olbmot eai livčče goassege gullan. Mis lea buorre dovdu ja mun jáhkán, ahte olbmot liikojit dása! 

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä