Galbmačáhci niskái buollašis – Badjel 150 aktivistta lápmašuvvan Davvi-Dakotas
Standing Rock oljostuimmiin doaibmi fávttat válde čázivárjaleaddjiid gitta Davvi-Dakota oassestáhtas ja dan maŋŋá njuoskadan sin galbmačáziin. The Guardian -aviisa dieđuid mielde dáhpáhusaid áigge báiki alde lea leamašan 3 gráđa buolaš.
Čuođit miellačájeheaddjit leat lápmašuvvan Davvi-Dakota oljostuimmiin, go guovllus doaibmi fávttat leat geavahan ganjalgáša ja njuoskadan galbmačáziin miellačájeheaddjiid Standing Rock Sioux -reserváhtas, muitala The Guardian.
The Guardian -aviisa dieđuid mielde miellačájeheaddjit leat vuos váldon gitta ja dan maŋŋá njuoskadan sin galbmačáziin. Dáhpáhusaid áigge báikki alde lea leamašan 3 gráđa buolaš.
Gummeluođain báhčán olbmuid
Miellačájeheaddjiid mielde fávttat leat maiddái báhčán olbmuid gummeluođain ja čáhcevárjaleaddjit leat hávváduvvan.
Standing Rockas doaibmi dearvvašvuođa- ja dálkkodanráđđi Standing Rock Medic & Healer Council lea čállán iežas Facebook -siidui, ahte dilli guovllus lea hirbmat fuolastuhtti.
– Dalkkadansuorggi áššedovdin, mii leat hui fuolas dan duođalaš riskkas, ahte muhtin sáhttá galbmot jámaš dakkár dilis, čállá Standing Rock Medic & Healer Council.
The Guardian -aviissa dieđuid mielde oktiibuot 167 olbmo leat lápmašuvvan báikki alde ja 7 olbmo leat dolvon buohccevissui.
Veahkaválddálašvuođat fávttaid ja čáhcevárjaleaddjiid gaskkas
Amerihkálaš eamiálbmogat leat vuostálastan oljobohcci huksema olles čavčča. Miellačájáhusaid leat doallan Standing Rock Sioux -reserváhtas Davvi-Dakota oassestáhtas.
Nu gohčoduvvon Dakota Access Pipeline -oljobohcci lea meroštallon máksit 3,3 miljárdda euro ja galggašii rasttildit oktiibuot njeallje oassestáhta.
Amerihkálaš eamiálbmogat leat vuostálastan oljobohcci huksema olles čavčča. Miellačájáhusaid leat doallan Standing Rock Sioux -reserváhtas Davvi-Dakotas USA:s. Oljobohcci galggašii mannat sin guovllu čađa.
