Sápmi |

Gálddoaivvi bálgosa golbma badjeolbmo dubmejuvvon behttosa geahččaleamis evttolaš fáŋgavuhtii

Badjeolbmot bukte Lappi gearretrievtti duomu mielde goit 21 čearpmaha lobi haga bálgosii.

poro
Vuossárgga addojuvvui duopmu čearpmahiid lobihis buktimis bálgosii. Gova bohccot eai laktás áššái. Govva: Vesa Toppari / Yle

Lappi gearretriekti attii vuossárgga duomu áššis, mas Gálddoaivvi bálgosa golbma badjeolbmo sivahuvvojedje behttosa geahččaleamis, go ledje buktán bohccuid lobi haga bálgosii.

Badjeolbmot dubmejuvvojedje behttosa geahččaleamis 30 beaivái evttolaš fáŋgavuhtii. Sii gártet ovttas maiddái máksit Gálddoaivvi bálgosii vahátbuhtadusaid 4200 euro ja dasa lassin gearregastingoluid ja áššeoasálašgoluid oktiibuot 9460,40 euro.

Dagahedje ruđalaš vahágiid bálgosii

Lappi gearretrievtti duomu mielde badjeolbmot leat buktán 21 čearpmaha bálgosii lobi haga, ja dainnaládje dagahan ruđalaš vahágiid bálgosa eará badjeolbmuide.

– Go muhtin siidda boazolohku šaddá lobi haga, gártet eará siiddat njuovvat eanet, ja sidjiide šaddet ruđalaš vahágat boazologu geahppaneamis, duomus celket.

Rihkkusnamahus lea behttosa geahččaleapmi, danin go bálgosis leat goittotge lohkan bohccuid dan maŋŋil go lobihis buktimis šattai eahpádus ja lasihan čearpmahiid boazolohkui.

Duomus ii leat vel lága fápmu.

Alaguoddi gáibidii badjeolbmuide duomu behttosa geahččaleamis dahje nuppisadjásaččat boazodoallorihkkumušas ja ráŋggaštussan evttolaš fáŋgavuođa dahje stuorra sáhkuid. Bálggus lei ovttaoaivilis alaguoddi gáibádusaiguin, muhto gáibidii duomu maiddái behttosis dahje roavvá behttosis dahje dan geahččaleamis ja badjeolbmuin 27 650 euro vahátbuhtadusaid. Badjeolbmot šiite visot sivahusaid ja bálgosa gáibádusaid.

Varrasamosat: Sápmi

Váldoođđasat

Varrasamosat

Muualla Yle.fi:ssä