Sápmi |

Gálddoaivvi bálgosis gildet olggobeale olbmuid galledeamis bigálusaid – BO ávžžuha ráhkkanit koronavirusa leavvamii bálgosiid siste

Bálgosat čuvvot stáhta ja Bálgosiid ovttastumi rávvagiid eastadandihte koronavirusa leavvama.

Varaporoisäntä Niila Laiti Utsjoelta
Niila Laiti muitala, ahte olggobeal olbmot eai leat dál koronaáigge buresboahtán čuovvut sin bigálusaid. Govva: Anneli Lappalainen / Yle

Miehtá Sámi čohkkegohtet fas ealuid bigálusaide. Gárddástallamiid oktavuođas gártá leat maid dahkamušas eará olbmuiguin, iige dorvogaskkage leat vejolaš álo doallat nu mo koronapandemiija áigge galggašii. Danin Bálgosiid ovttastupmi ávžžuhage bálgosiid árvvoštallat, geat sáhttet leat áidde luhtte bigálusaid čuovvumin.

Gálddoaivve bálggus mearridii čakčačoahkkimisttis, ahte sii eai váldde vuostá boazodoalu olggobeale gallededdjiid bálgosa bigálusbáikái. Galledallangielddus guoská Skállovári bigálusbáikki ja dan lagaš birrasa.

Gálddoaivvi várreboazoisit Niila Laiti muitala, ahte bálgosis ledje ovttamielalaččat dán áššis.

– Mii hálešteimmet dán dili birra ja buohkain bálgosis lea áddejupmi das, ahte mii eat sáhte buohccát ja njoammudit dan earáide. Mis báhcet muđui buot barggut barggakeahttá, ja boazobarggut leat dakkárat, ahte daid ii sáhte sirdit.

Laiti mielde bálgosis čuvvot Suomas addojuvvon rávvagiid ovdamearkka dihte hygienas. Máskkaid sii eai vuos áiggo atnit, muhto leat gárvásat vihkkehallat daid geavaheami vel maŋŋelabbos jus dilli rievdá.

Niila Laiti muitala Anneli Lappalainen jearahallamis Gálddoaivvi bálgosa koronadoaimmain. Jietna: Anneli Lappalainen / Yle

– Ja dat lea čielga ášši, ahte jus lea buozus, de ii galgga boahtit gárdde lusa, deattuha Laiti.

Lappi bálgosa boazoisit Antti Äärelä muitala, ahte sis lei maiddái geassit miessemearkumiid oktavuođas gallestallangielddus. Bálgosa stivra gieđahallá ášši vel bigálusaid oasil ovdal gárddástallamiid.

– Mii mannat stáhta ja Bálgosiid ovttastumi rávvagiiguin, lohká Äärelä.

BO ávžžuha bálgosiid ráhkkanit maiddái dávdda leavvamii badjeolbmuid gaskkas

Bálgosiid ovttastumi doaimmajođiheaddji Anne Ollila mielas lea buorre, ahte bálgosat čuvvot sin ávžžuhusa galledangildosis. Son goittotge ávžžuha bálgosiid ja badjeolbmuid ráhkkanit dasa, ahte dávda leavvagoahtá bálgosa siste.

– Dieđus boazoeaiggát oažžu bigálussii oassálastit, muhto sáhtášii smiehttat, ahte leago olles bearrašis dárbu oassálastit. Bálgosat sáhtášedje smiehttat, ahte leago vejolaš doallat olbmuid sierra nu ahte livčče de dearvvas olbmot bálgosis, jus dávda leavvagoahtá.

Anne Ollila on Paliskuntain yhdistyksen toiminnanjohtaja.
Anne Ollila ávžžuha badjeolbmuid mannat koronatesttii, jus ihtet vehášge dávdamearkkat. Govva: Vesa Toppari / Yle

Ovttaskas badjeolmmoš sáhttá ráhkkanit maid nu, ahte lea soahpan sadjásašveahki gárvvisin, jus buohccá.

Ollila deattuha, ahte koronatestii galgá mannat dalán, jus makkárge dávdamearkkat ihtet ja bissut čavgadit karantenas.

Anne Ollila muitala Xia Torikka jearahallamis, mo Bálgosiid ovttastus ávžžuha bálgosiid ráhkkanit koronavirusa leavvamii. Jietna: Xia Torikka / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä