Koe uusi yle.fi
Sápmi |

Gápmasa ja Giellá gaskasaš geaidnobarggut gárváneamen

Ealáhus-, johtolat- ja birasguovddážis lohpidit, ahte buot geaidnobárggut davvin valmmáštuvvet nugo lea lohpiduvvon.

busse
Turistabusse lea čiessan ádjaga beallái, go lei čáhkken geaidnobárgguid ovddas menddo guhkás ravdii. Govva lea váldon Gápmasa ja Giellá gaskkas. Govva: privahtta

Jos dán geasi lea vuodján Gápmasis Gáregasnjárgii, de lea várra gártan vuorddášit ja vuodjit golmmalogi geaidnobárgguid dihtii. Dál čakčat geaidnobarggut orrot ain nu gaskan, ahte olbmot leat eahpidišgoahtán válmmaštuvvágo geaidnu ollege ovdal dálvvi. Ealáhus-, johtolat- ja birasguovddážis gomihit eahpádusaid.

– Eahpádusaide ii leat miige ákkaid. Geaidnu dahkko johtilis áigedávvala mielde ja bajildusbarggut galggašedje dálá plánaid mielde leat gárvá čakčamánu 15. beaivve, nanne guovlovástideaddji Markku Riipi.

– Dan maŋŋá dahkkojit dušše smávva loahppabarggut, geaidnobargit divodit ravddaid ja málejit sárgáid.

Maiddái Gáregasnjárgga ja Ohcejoga gaskkas leamašan geaidnobarggut dán gease. Geaidnobarggut leat doppege gárvá.

– Oljočievrra leat jo leiken ja doppe dahkkojit vel smávva divvumiid čakčamánu loahpa geahčen, lohká Riipi.

Son muitala, ahte maiddái Ohcejotnjálmmi luottaid bajildusbargguid dahket čakčamánu beallemuttu maŋŋá lohppii.

Jos geaidnobarggut heađuštit ja dagahit vahagiid

Go leat geaidnobarggut jođus ja geainnu ala vuddjo sáttu ja čievra, de doppe sáhttet leat bastilis geađggit. Jos deaivá fuones tuvra, de sáhttá bártidit. Geaidnobarggut heađuštit geainnuid alde johttiid, mieđiha Riipi.

– Rieggáthan sáhttet mannat ain duollet dálle. Lea váttis dadjat leago luodda dasa sivalaš.

Geainnuid dagahan vahagiid buhtadeapmái lea iežas ortnet, muitala Ealáhus-, johtolat- ja birasguovddáža guovlovástideaddji Markku Riipi.

– Jos geainnu geavaheaddji lea dan mielas, ahte luodda lea dagahan vahaga, mis lea vahagiid buhtadanortnet, mii dutká ja váldá beali dasa, ahte leago sivva luottas ja leago luotta doalli iešdáhtos dagahan vahaga. Jos nu lea, de stáhta buhtada vahága.

Riipi muitala, ahte buhtadanortnegis gávdnojit dárkilis dieđut ja rávvagat Ealáhus-, johtolat- ja birasguovddáža interneahttasiidduin.

– Ealáhus-, johtolat- ja birasguovddáš ii leat dáhkáduslágádus ja juohke áidna dáhpáhus gieđahallojuvvo sierra, muittuha Riipi.

Riipi hálida maid fuomášuhttit, ahte geaidnobarggut heađuštit álo veháš. Riipi mielde Gáregasnjárgga geainnu alde johtti báikkálaš olbmot leamašan duđavaččat dasa, mo luotta leat divodan.

– Dashan vuolidedje dakkár sajiid, mat leat hehtten oaidnima ja maiddái leat lokten badjeleabbui hui vuollegis báikkiid ja govddidan geainnu. Dát divvumat buoridit luotta dorvvolašvuođa ja dahket vuodjima álkibun, deattuha Riipi.

Davimus Lappis čuovvovaš stuorát geaidnobarggut álget Njellim geainnu alde boahtte jagi bealde. Dán čavčča válljejuvvo fitnodat dán bargui, muitala Riipi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä