Sápmi |

Gárasavvona báikki olbmuid ordnen festivála stuorru jagis nubbái – artisttat ja ovttastallan geasuhit

Eaktodáhtolaš vuimmiiguin lágidit Dansklacken på Dosan -festivála, mii geasuha eanet aht´ eanet olbmuid Gárasavvonii suoidnemánu maŋimuš vahkuloahpa.

Dansklacken På Dosan
Festiválaguovllu lahka, Muonájoga gáttis lei vejolaš maid ijastallat. Govva: Martta Alajärvi / Yle

GÁRASAVVON. Mannan vahkuloahpa 350 ássi Gárasavvon márkan dievai olbmuin, go lagaš giliin ja guhkkelabbos ledje olbmot čoahkkanan Gárasavvona márkaniidda ja dan oktavuođas Dansklacken på Dosan -festiválii.

Festivála áigge Gárasavvonis ledje márkanat, njoarostangilvu ja konsearttat bearjadaga ja lávvordaga. Báikkálaš olbmot Gárasavvonis álggahedje festivála guhtta jagi dassái, go orui ahte Gárasavvona márkanat eai šat geasuhan doarvái olbmuid. .

“Dákkár doalut leat buorre dákkár unna báikái”

Báikkálaš boazobárdni, Ber-Joná Labba illuda, go nu olu olbmot leat čoahkkanan su ruovttumárkanii. Sus lei maid veháš bargu festiválas, go son láidestii konsearttaid bearjadaga ja lávvardaga.

– Dat lea hui buorre dákkár unna báikái, ahte bohtet ná olu olbmot. Bohtet ruoktut deike ja bohtet vel doppe olggul meid olu olbmot, Ber-Joná Labba dadjá.

Geaggánvuomi čerrui gullevaš Ber-Joná Labba lea beaggán maid SVT tv-ráiddus Boazovázzit, mii čalmmustahttá boazoolbmuid eallima. Labba lohká, ahte lei dehálaš čájehit sin eallima, go olbmot eai dan nu bures dovdda.

– Dat lei hui somá, ja beassá vuosehit dan min eallima, makkár dat lea. Mun jáhkán dat olbmot ipmirdit eanet de, mainna min bargat, Labba lohká.

Ber-Joná Labba Dansklacken På Dosan 2018
Ber-Joná Labba Dansklacken På Dosan -lávddi alde, son lei festivála lágideaddji. Govva: Martta Alajärvi / Yle

Sohpparis, 50 kilomehtera geahčen ledje John-Issát Labba, Douglas Labba ja Simon Nutti boahtán návddašit festiváladovddus. Sii leat justa geargan miessemearkumiin, ja danin leige justa dát vahkuloahppa buorre doaluide.

– Dat lea somá, deaivá nu olu gili olbmuid. Dat lea jo somás festivála, deaivá visot olbmuid. Visot čearuid dás birra, dáppe mii deaivat, Simon Nutti dadjá.

John-Isák Labba Douglas Labba
John-Issát Labba ja Douglas Labba ovttas Simon Nuttiin ledje boahtán Sohpparis Gárasavvonii festiválii. Govva: Martta Alajärvi / Yle

Njoarostangilvu geasuhii bearrašiid čuovvut gilvvu

Lávvordaga olbmot johte beaivit Gárasavvona márkaniin oastimin njálgáid ja geahččamin iešguđet diŋggaid. Beaivet lágiduvvui maiddái njoarostangilvu festiválabáikkis.

Gilvu geasuhii olleš bearrašiid čuovvut ja doarjut iežaset favorihtaid. Gilvui oassálaste lagas čearuid ja moadde Suoma beal bálgosa boazoolbmot.

Gilvvu vuittii Nils Ovlla Labba Geaggánvuomi čearus, nubbin bođii Lars-Ante Vasara ja goalmmát saji juogadeigga Niko Näkkäläjärvi ja Lars-Ante Utsi.

Nils-Ovllá Labba
Nils Ovllá Labba vuittii njoarostangilvvu 10 čuoggáin. Govva: Martta Alajärvi / Yle

Gilvu lea leamaš álggu rájes dáhpáhusa prográmmas, muhto dál geahččaledje vuosttas háve gilvvu lihkadeaddji stoalppuiguin. Gilvvu lágideaddji Per Ánte Hurri lohká, ahte gilvu geasuhii bures ja lei somá go njoarosteaddjit fuobmájedje, mot darvehit lihkadeaddji stolpui.

– Dat lea hui miellagiddevaš, go olbmot huobmájit fal dan, ahte gávdno dakkár málle, gilvvohallan, Hurri lohká.

Per Anders Hurri
Gárasavvonlaš Per Ánte Hurri lea leamaš mielde ordnemin festivála jo máŋga jagi. Govva: Martta Alajärvi / Yle
Gárasavvona doalut orrot stuorrumin juohke jagi dan rájes, go mearridedje márkaniid lassin ordnet eahketkonsearttaid, Per ÁnteHurri čilge.

– Dat bohtet juohke guovllun, doppe vuollelis Lulli-Ruoŧan, ja Suomannai bohtet, dat stuorru. Dáppe leat oainnát artisttat, dakkár gullus artisttat, dat dat buktet olbmuid, Hurri lohká.

Felgen Orkester: “Livčče somá čuojahit eambbo dáppe”

Dansklacken på Dosan ii leat justa sámefestivála, muhto doppe čuojahit maid Ruoŧa artisttat. Dán jagáš festiválas sámeartistan ledje mielde Felgen Orkester ja Sofia Jannok.

Sofia Jannok Dansklacken På Dosan 2018
Sofia Jannok loaiddastii lávvardaga. Govva: Martta Alajärvi / Yle
Kárášjohkalaš Felgen Orkester loaiddastii Gárasavvonis bearjadaga maŋimuš artistan. Dát lei sin vuosttas konsearta Gárasavvonis.

Joavku lei goit oktii čuojahan Ruoŧa beal Sámis, Johkamohki márkaniin, ja vurde dan vuođul suohtas eahkeda maid Gárasavvonis.

– Mii leat dušše oktii ovdal čuojahan dán guovllus, ja livččii somá čuojahit eambbo dáppe. Go dat aŋkke orru, ahte lea nu, ahte dat bohtet olu olbmot, Petter Tretnes Hansen dadjá.

Felgen orkester
Felgen Orkestera konseartta lei bearjadateahkeda maŋimuš. Govva: Martta Alajärvi / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä