Sápmi |

Gárasavvona skuvlla sáhttet geavahit jagi lohppii, gielddaráđđehus mearrida sadjásaš lanjain – rektor: "Olbmuin leat leamašan juogalágán dávdamearkkat"

Gárasavvona skuvllas leat gávdnan earret eará dearvvašvuhtii váralaš mikrobaid, man dihte skuvla galgá geavahangildosii. Gielddaráđđehus mearrida gaskaboddosaš lanjain, go dat galggašedje gávdnot ovdal boahtte jagi.

Karesuvannon koulu
Gárasavvona skuvllas leat 28 oahppi ja sidjiide galgá jagi loahpa rádjai gávdnat sadjásaš skuvlalanjaid. Govva: Marianne Ketola / Yle

Gárasavvona skuvllas ja beaivedikšu Touhulas leat gávnnahan sisáibmováttisvuođaid, mat leat dagahan olbmuide dávdamearkkaid.

– Olbmuin leat leamašan juogalágán dávdamearkkat ja dan dihte Eanodaga gielda diŋgui dohko dearvvašvuođadárkkistusa, skuvlla rektor Riitta Peltovuoma muitala.

Riitta Peltovuoma, Eanodat, oahpahus
Skuvlla rektor Riitta Peltovuoma lohká, ahte olbmuide leat boahtán váttut skuvlla lanjain heajos sisáimmu dihte. Govva: Anni-Saara Paltto / Yle

Geasset skuvllas leat mihtidan ja dutkan dili. Skuvlavistti ii sáhte geavahit ja skuvla ja beaivedikšu sirdašuvvet sadjásaš visttiide. Skuvlla visttiid oažžu geavahit vel jagi loahpa rádjái.

– Jus sadjásaš lanjat eai gávdno dan rádjái, de lea vejolaš oažžut vehá lasseáiggi, lohká Peltovuoma.

Skuvllas gávdne ovdamearkka dihte mikrobaid

Gárasavvona skuvllas leat dán skuvlajagis 28 máná, muhto boahtte jagi vehá unnit, 22.

Skuvlla ja beaivedivššu visttiid leat gárten giđa ja geasi áigge, ja birasdearvvašvuođafuolahusa dutkamušain leat gávnnahan feaillaid, mat heajudahttet sisáimmu. Riitta Peltovuoma muitala, ahte doppe leat gávdnan ovdamearkka dihte mikrobaid.

Karesuvannon koulu
Gárasavvona skuvla lea huksejuvvon 1970-logus. Govva: Marianne Ketola / Yle

Dutkamušaid mielde sajit eai šat deavdde dearvvašlaš sisáibmui ásahuvvon gáibádusaid. Dál barget buot dakkár vejolaš doaimmaid, ahte lanjat eai livčče nu váralaččat vel dan botta, go dat leat geavahusas.

Gielddaráđđehus mearrida sadjásaš lanjaid skuvlii

Čuovvovaččat ášši ovdána Eanodaga gieldda eallinfápmolávdegoddái, gielddaráđđehussii ja váldostivrii. Sii mearridit gaskaboddosaš lanjain.

Eanodaga gielddaráđđehusa ságadoalli Leena Palojärvi lohká, ahte ášši lea easkka jurddahallamis. Goittotge saji ferte ordnet dán jagi bealde, son muitala.

keskustan puoluekokousedustaja Leena Palojärvi Enontekiöltä.
Eanodaga gielddaráđđehusa ságadoalli Leena Palojärvi lohká, ahte mearrádusat eai leat skuvlla gaskaboddosaš dilis vel dahkkon, muhto dain galgá mearridit ovdal ođđa jagi. Govva: Jarmo Honkanen / Yle

Ođđa skuvlla galgá jáhkkimis de hukset boahttevuođas, árvala Palojärvi. Dat goittotge váldá áiggi.

– Dan ferte plánet ja miihan leat oaidnán, ahte gieldda plánen ii mana nu jođánit, son muitala.

Gárasavvonis leat guhká plánen máŋggadoaimmadálu, man gáhtu vuolde skuvlage sáhtášii boahttevuođas gávdnot. Dál goittotge easkka dan plánemii lea ruhta, muhto ii huksemii.

Yle Ođđasiid Sámis ja Beaivvi ságaid sáhttá guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä