Sápmi |

Gárasavvonlaččat: "Čáppat lea luoddaguora vánddardit go čorgat lea"

Gárasavvonlaččat čoahkkanedje čorget luoddaguoras ruskkaid eret. Luonit gal gávdnojedje mánáid dárkilis čalmmiid ja háhppilis gieđaid geažil.

Video: Kaaresuvannon siivoustalkoot
Saara Ketola oktan áhkkubiiddisguin Siire ja Ánná Ketolain čorgii luoddaguora. Elle-Máret Ketola doaimmaheaddji Jovnna Aikio leigga maid mielde. Geahča videos, go gárasavvonlaččat čoahkkanedje vuolgit čorget gili. Video: Anneli Lappalainen / Yle

Gárasavvona gili olbmot čoahkkanedje ovttasbargun čoaggit luoddaguoras ruskkaid. Gilisearvi ordne jahkásaččat ovttasbarggu birrasa čorgema dáfus ja seammás čiŋahit gili rásiiguin. Dán vuoro birrasa čorgemii oassálaste badjelaš logi olbmo.

Viššalis gárasavvonlaččat bieđganedje geaidnoravddaid čorget miehtá gili. Yle Sámi doaimmaheaddji Jovnna Aikio maid beasai čorget Gilbbesjávrái johtti geaidnoguora.

Ketola bearraša unnoraččaid dárkilis čalmmit ja háhppilis gieđat goit gávdne jođánit luniid. Sire Ketola atná dehálažžan luniid čoaggima juo danin, ahte eallit eai boraše daid. Ánná Ketola beasai dinestit seammás, go gávnnai earáge go ruskkaid.

Sáhkkis doaimmaheaddji ii máššan baicce jearralii, ahte mii su seahkas lea.

– Na boahtalat ja ruskkat, vástida Ánná Ketola.

Nieidda guoktá áhkku Saara Ketola lei vuordán eanetge ruskkaid, muhto dál fertii duhtat geahpa sehkii.

– Mu mielas orro, ahte soamis lea juo čoaggán daid ruskkaid, dábálaččat lávejit eanet. Ja mus dat áhkkubat leat nu viššalat, dat lea nu suohtas daiguin ovttas čoaggit. Dat leat nu čalbmešat daidda ruskkaide, rábmo Ketola.

Gárasavvonis eai bálkko máskkaid luoddagurrii

Doaimmaheaddji Jovnna Aikio vurddii, ahte máskkat dat devdet luoddaguora dán áigge, muhto dál ii leange nu.

– Mun ledjen gáddán, ahte go álgá luniid, ruskkaid čoaggit ovtta giliguovddážis, ahte dat máskkat dat bohtet ovddemustá ovdii, muhto manai vissa moaddelot minuhta, ovdalgo vuosttas máska gávdnui. Buot eará gal lei, dego njálggesbáhpárat, juhkamušstobet ja boahtalat, čilge Aikio.

Elle-Máret Ketola muitala, ahte juohke giđa sii figget čorget iežaset gili. Su mielas luniid čoaggin mearkkaša dan, ahte biras lea čorgat.

– Čáppat lea luoddaguora vánddardit go čorgat lea. Ii leat nu fiinnis go ruskkat leat miehtá.

Aikio velá jearastii nieiddain, ahte gillejitgo sii nuppe bealde geainnu vel čoaggit, go dat váldá seamma áiggi ja seamma ollu galgá bivastaga golggahit.

– Gal, juo, gal mii gillet!

Dán áššis sáhtát geahččat lasi duorastaga Yle Ođđasat -sáddagis Yle TV1:žis diibmu 15.45. Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä