Sápmi |

Gáregasnjárgga skuvllalaččat besset fargga gazzat oahpu áibbas ođđa skuvllas

Oahpahus ođđa skuvllas galggalii plánáid mielde álgit čakčamánu 21. beaivve.

Karigasniemen uusi koulu.
Čakčamánu álggus ođđa skuvlavisti lea ceaggut, muhto unna ordnemiid doppe vel dahkket. Govva: Inger-Elle Suoninen / Yle

Gáregasnjárgga gilis Ohcejoga gielddas ceaggá ođđa máŋggadoaimmaskuvla, mii gálgalii bálvalit goit čuovvovaš 50 jagi. Unna ordnestallamiid dat vel gáibida, ovdal go dohko sáhttá doalvut viessogálvvuid ja álggahit oahpahusa.

– Mii gal doaivut, ahte čuovvovaš 50 jagi lea dát skuvla dás, ahte dat lea dainna mielain álggahuvvon ja čađahuvvon, muitala Ohcejoga gieldda giddodathoavda ja huksendárkkisteaddji Markku Porsanger.

Garegasnjárgii huksejedje ođđa skuvlla earret eará danin, go boares skuvllas olbmot reagerejedje sisáibmui. Plánáid mielde oahpahusa ođđa skuvllas sáhttet álggahit čakčamánu 21. beaivve.

Váikko Gáregasnjárggas skuvla ja beaiveruoktu besset ođđa skuvlavistái, nu maiddái oassi jo ovdal geavahusas leamašan sajiin báhcá geavahussii. Njeallje jagi dassá Gáregasnjárggas válde atnui ođđa Njálla-nammasaš lihkadansále. Sále bissu vel anus ja vistti meinejit maid divodit.

– Dan boares oassái, mii lea laktásan diesa Njálla-hállii, boahtá vel divvumuš ja divvojuvvo dalle maŋŋá. Dohko divvot giehtaduodjesajiid ja skuvlla dearvvašvuođadikšu lanja.

Gudal Markku Porsanger jearahallama dás. Jietna: Inger-Elle Suoninen / Yle

Marjo Paltto.
Vánhen Marjo Palttos lea buorre dovdu, go mánát besset dearvvaš skuvlii. Govva: Inger-Elle Suoninen

Gáregasnjárgalaš eadni Marjo Paltto lea duđavaš, go fargga mánát ja oahpaheaddjit besset ođđa skuvlii.

– Mánát besset álggahit dearvvaš skuvllas oahpuid. Musge nieida manná vuosttaš luohkkái, nu ii dárbbat guohpaskuvllas studeret. Sisáibmováttisvuođat leat leamašan máŋga jagi, nu hui buorre dovdu lea dál, muitala Paltto.

Son ii leat vel fitnan oahpásmuvvame ođđa skuvlii, muhto son gal jo gealdagasas vuordá dan, ahte vánhemat besset oahpásmuvvat ođđa skuvlii.

– Lea somá beassat oahpásmuvvat ođđa sajiide. Dán rádjai in leat oaidnán go báhpára alde dan.

Ohcejoga gielddas maiddái Ohcejotnjálmmis váldui dán čavčča atnui ođđa skuvla ja maiddái Njuorggámii lea boahtime ođđa skuvla. Mannán jagi álggus Ohcejoga gielddas mearridedje, ahte sii huksejit golbma ođđa skuvlla.

Varrasamosat: Sápmi

Váldoođđasat

Varrasamosat

Muualla Yle.fi:ssä