Sápmi |

Gávcci erenoamaš vásáhusa Ijahis ijas govvan ja videon

Dán jagi Ijahis idja lei stuorát, eanet politihkalaš ja eanet girjái go goassege ovdal. Dá gávcci erenoamaš vásáhusa Ijahis ijas govvan ja videon.

Sofia Jannok, Ijahis idja 2016
Sámi musihkka lea hui kreatiiva muttus, govvidii Yle doaimmaheaddji Jaana Kanninen radioođđasiin lávvardaga. Govas festivála dronnet Sofia Jannok. Govva: Jonne Järvinen / Yle

1. Sofia Jannok lei Ijahis ija dronnet

Sofia Jannok, Ijahis idja 2016
Govva: Jonne Järvinen / Yle
– Ijahis idja fámuidahttá min. Ovttaskas olmmošin ja álbmogin, muitala Jenni Laiti Johkamohkis Yle váldo-tv-sáddagis.

Seamma dadje máŋga earáge olbmo bearjadateahkeda Amoc, Sofia Jannok ja Ylva konsearttaid maŋŋá. Sami vuoigŋa oidnui ja gullui lávddi alde ja eahkeda dronnet lei aktivista-artista Sofia Jannok.

Ođđa politihkalaš Orda-skearru bihttát, dego This Is My Land, We Are Still Here ja Snow Grouse, leat šaddan olbmuide oahpisin musihkkavideoin ja radios ja dat vuhttui. Ijahis ijas lei hui erenoamaš oktavuohta geahččiid ja artistta gaskavuođas. Sofia Jannok dajai máŋgii lávddi alde, ahte eahket lei maid sutnje hui erenaoamaš.

2. Amoc, Sofia Jannok ja Niillas Holmberg máŋgii ovttas lávddi alde

Amoc, Niillas Holmberg, Ylva ja Sofia Jannok, Ijahis idja 2016
Govva: Jonne Järvinen / Yle
– Ijahis idja lea dakkár festivála, man ferte beassat vásihit báikki alde ovdalgo ádde mas lea gažaldat. Mii beare sáhttá dáhpáhuvvat, buvttadeaddji Oula Guttorm dadjá ja čujuha bearjadaga konsearttaide.

Bearjadaga váldoartisttat Amoc, Sofia Jannok ja Ylva Niillas Holmberg ledje eahkeda áigge máŋgii ovttas lávddi alde. Okta sin bihttáin lei Gulahallat eatnamiin.

3. Ylva ja Suohpanterror válde garrasit beali Deanu ođđa soahpamuša vuostá

Ylva ja Suohpanterror, Ijahis idja 2016
Govva: Jonne Järvinen / Yle
Ylva maŋimuš bihttá áigge lávddi alde lei performánsa, mii válddii garrasit beali Deanu ođđa soahpamuša vuostá ja sámiid guolástanrivttiid beales.

Ylva ja Suohpanterror, Ijahis idja 2016
Govva: Jonne Järvinen / Yle
Ylva juoigi Niillas Holmberg gaikkui teatrálalaččat plakáhta, mas logai Colonialistic fishing licence denied, Kolonialistalaš guolástanlohpi gildojuvvon.  

Suohpanterrora uolástanlohpi, Ijahis idja 2016
Govva: Pirita Näkkäläjärvi / Yle
– Muhto áiggit leat nuppástuvvamin. Vel boahtá áigi, goas lea álkit oažžut guolástanlobi go málbmalobi Sápmái, sárdnidii Niillas Holmberg lávddi alde (video) ja gávttehas geahččijoavku doaškkui gieđaid ja biškkui.

Dan maŋŋá lávddi ala vázzii eallijoavku, mii geigii olbmuide sámi guolástanlobiid (video).

Sápmelaš, dus lea riekti guolástit čáziin, mat gullet du sohkii ja main du máttut leat guolástan. Dát vuoigatvuohta lea álo leamašan, ja lágat mat dan gomihit, eai leat goassige dovddastuvvon.

4. Ánnámaret Ensemble guoskkahii álbmoga dáiddalaš konsearttain

Ánnámáret Ensemble, Ijahis idja 2016
Govva: Paadar Images / Ijahis idja

– Bealiváldin ovttastahttá nuorra sámeártisttaid, čilgii doaimmaheaddji Jaana Kanninen Yle váldo-tv-ođđasiin bearjadaga.

Ánnámáret Ensemble konsearta lei okta máŋgga Ijahis ija ovdanbuktimis, main lei čielga sámepolitihkalaš temá.

Mii eallit min eallima, mii eallit dan maŋŋelnai go leat váldán mis giela ja gaikon min gávttiid. Baldan min ipmiliid, dadjan eanan lea du. Dál áiggot leat okta mis dan maŋŋelge go visot geahččalit duššadit. Mo máilbmi ipmirdivčče, gii gulla min heahtečuorvasa – Ánnámáret Ensemble: Okta mis

Gollehelmmot-skearru almmustahtinkonsearta lei hui dáiddalaš ja dat guoskkahii olbmuid. Fámolaš ja joba dramáhtalaš ovdanbuktima lassin šearpmas oidnojedje Marja Helander govat Ruošša beale Sámi ruvkeguovlluin ja Čáhppes ráidu -miellačájáhusas riikkabeivviin. Álbmot doaškkui gieđaid čuočču Ánnámáret Ensemble konseartta maŋŋá.

5. Čájehit sámi vuoiŋŋa gávttiin

Ijahis idja 2016
Govva: Jonne Järvinen / Yle
Ijahis ijas oidnojit juohke jagi eanet ah eanet gávttit.

Festiválašiljus viegadedje gávttehas mánát, olbmot njoarostedje gávttit badjelis, máŋgasat ledje gorron ođđa geassegávttiid festiválii. Dán jagi arvige ii baldán olbmuid – gávttiid alde ledje ovdamearkan čađačuovgi arvesuojit.

Lasi govat Yle Sámi Facebook- ja Instagram-siidduin.

6. "Sámi valáštallangilvvut čatne sámi ealáhusaid Ijahis idjii"

Taneli Magga njoarosta Ijahis ijas 2016
Govva: Jonne Järvinen / Yle
– Sohkabuolvvat leat ovttas dán min festiválas. Dán jagi prográmmii lasihuvvon valáštallangilvvut čatne sámi ealáhusaid mielde festiválii. Ealáhusat leat goittotge dat, mat dollet min kultuvrra eallin, dadjá festivála dáiddalaš jođiheaddji Anna Näkkäläjärvi-Länsman.

Lágideaddjit ledje oppa lohkái duđavaččat mánáid, nuoraid ja ollesolbmuid suohpansprint- ja njoarostangilvvuide, maid festivála váldolágideaddji Anara Sámi Searvvi ságadoalli Ásllat Paltto láidestii bearjadaga ja lávvardaga.

Valáštallangilvvut leat prográmmas maid boahtte jagi. Geahča video njoarostanstiillain Yle Sámi Facebook-siidduin.

7. "Sámi musihkka lea hui kreatiiva muttus"

Irdon, Ijahis idja 2016
Govva: Paadar Images / Ijahis idja
– Sámi musihkka lea hui kreatiiva muttus, govvida doaimmaheaddji Jaana Kanninen Ijahis ija musihka birra njuolggoradioraporttas Yle Radio Suomas lávvardaga. Son čujuha erenoamažit joavkkuide, mat ovttastahtet luođi ja elektronalaš musihka.

Kanninen muittuhii maid, ahte luohti lea ain dego láhtti, mii leat buot sámi artisttaid vuođđu. Geahča dás video luohte–livđe–leu'dd-konsearttas.

Okta joavku, man ii goittotge galgga vajálduhtit, leat Ijahis ija buvttadeaddji Oula Guttorm ja su oappá Anni rock-joavku Irdon. Joavkku bihttáid lyrihkat dávistit vásáhusaid, mat leat hui oahpásat dálá sámi nuoraide.

Lávlu Anni Guttorm muitalii lávddi alde, ahte son čálii lávlaga das, go son ii goassege beassan oahppat duddjoma iežas áhkus dahje fitnat sin soga luomejeakkis suinna, muhto finai gal máddin studeremin sámeáššiid universitehtas. Muitalettiin Anni Guttorm njuorrasii iige son lean áidna. Gávttehas geahččijoavkkus máŋgasis leat seammalágan vásáhusat ja daidda laktaseaddji bahčage dovddut.

Okta Irdona eanemus erenoamaš bihttáin lea goittotge garra rock-bihttá Jorralan sielut. Geahča video dan Irdona bihttás, mii soaitá leat sámi garrasamos rock-bihttá.

8. Stadionrock sámi style – Felgen Orkestera galggai fitnat gohččumin eret lávddi alde

Felgen Orkester
Govva: Jonne Järvinen / Yle
Felgen Orkester čohkkii stuorámus geahččijoavkku lávvardaga arvvis fuolákeahttá. Olbmot dánso ja juige oahpes bihttáid jiellatjoavkkus mielde. Stadionrock sámi style!

Felgen Orkester, Ijahis idja 2016
Govva: Jonne Järvinen / Yle
Joavku lovttii čielgasit hui bures šerreš čuovggaid vuolde sevnnjodeaddji ijas. Sii muitaledje somás máidnasiid lávddi alde ja máinnašedje, ahte sii illudedje, go Ijahis ijas riŋgejedje ja bivde sin fas čuojahit Anárii.

Felgen Orkestera manager gárttaige fitnat gohččumin joavkku eret lávddi alde, go čuojahanáigi álggii nohkat. Dáideba moadde bivnnuhamos bihttá danin báhcit joba čuojakeahttá!

Varrasamosat: Sápmi

Váldoođđasat

Varrasamosat

Muualla Yle.fi:ssä