Sápmi |

Gávpejas giitala olbmuid go vedjet ain čuovvut koronarávvagiid – gávppašeaddji goit lea fuomášan, ahte olbmot eai muitte šat rávvagiid

Dat lea hirbmat buorre, ahte olbmot áddejit bassat eambbo gieđaid go goassige ovdal, giitala gávpejas Seppo Härkönen Gáregasnjárggas.

Kauppias Seppo Härkönen Karigasniemestä.
Dieđusge oaivvis jorret gažaldagat ja dovdu, ahte dat ii noga dása, ahte dat boahtá vel goittot oktii nie, ahte ráját sáhttet mannat gitta go olbmot leat fuollameahttumat, smiehtada gávpejas Seppo Härkönen Gáregasnjárggas. Govva: Vesa Toppari / Yle

Vaikko koronadilli leamašge ráfálaš davimus Suomas, de leat gávppit dáppege váldán vuhtii iežaset árgabeaivvis koronadili. Láhttiide leat merken dorvogaskkaid ja gávppašeaddjiide leat ordnen báikki gos bassat gieđaid ja bidjan maid desinfierenávdnasiid, gummegisttáid ja muohtosujiid oidnosii.

– Olgouvssain leat maiddái rávvagat. Dieđusge go olbmot leat jo nu guhká gillán dán dilis, de leat oahppan jo ja jáhkán, ahte dat báhcá dat vuohki boahtteáigái. Dat lea hirbmat buorre, ahte olbmot áddejit bassat eambbo gieđaid go goassige ovdal, giitala gávpejas Seppo Härkönen Gáregasnjárggas.

Härkönen muitala, ahte koronaráddjehusaid áigi lei lossat. Ráddjehusaid ložžen geassemánus movttiidahtii fas miela, go olbmot johtegohte fas. Jurdagis goittot lea gažaldat, ahte mo jus šaddá fas ođđa koronaepidemiija.

– Dieđusge oaivvis jorret gažaldagat ja dovdu, ahte dat ii noga dása, ahte dat boahtá vel goittot oktii nie, ahte ráját sáhttet mannat gitta go olbmot leat fuollameahttumat. Dat lea jo okta stuorámus sivva, manin sáhttá dáhpáhuvvat nie, smiehtada Härkönen.

Guldal dás gávpejas Seppo Härkönen jearahallama. Jietna: Jouni Aikio / Yle

Gávppašeaddji lea fuomášan, ahte olbmot orrot vajálduhttán koronarávvagiid

Koronavirusdávda dihttosta ain Lappi guovllusge. Lappis lea beaggán dánge vahkus koronanjoammundáhpáhus ja mannan vahkus koronanjoammumat gullostedje maid sámeguovllus, Eanodagas.

Bikká-Ándde Sámmol, Samuel Paltto lea fuomášan, ahte olbmot eai oro šat muitimin koronarávvagiid goit dorvogaskkain.

– Ieš gal iskkan leat várrugas, muhto mii ávkkiid go earát bahkkejit menddo lahka. In mun dal dan bala, ahte in dal duostta mannat gávpái, muhto smiehtan gal oppa áigge, ahte galggašii várrugas, dadjá Paltto.

Guldal dás Bikká-Ándde Sámmola jearahallama. Jietna: Susanna Guttorm / Yle

Geasseáigi buktá turisttaid davás, ja dan lea fuomášan maid Elle-Ovllá Jarmo, Jarmo Rasmus. Son goittot ii bala finadit gávppis, vaikko doppe livčče eamboge olbmot oktan suinna.

– Muhtumat láhttejit rávvagiid mielde, muhto eai buohkat. Mun gal maid ieš in geavat maide desinferenávdnasiid, eambbo manan ja váccán, muitala Rasmus.

Elle-Ovllá Jarmo ii leat vel jurdilan nu guhkás, ahte smiehtašii ođđa koronaepidemiija, muhto sáhttáhan nuge geavvat, árvala son.

– Dathan gal sáhttá boahtit. Olbmot go johtet dáppe ja deikka maid sáhttá korona leavvat.

Guldal dás Elle-Ovllá Jarmo jearahallama. Jietna: Susanna Guttorm / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä