Sápmi |

Gazzaealliid vuoiŋŋašdávda CWD lea vuosttaš háve gávdnon Suomas

CWD-dávda gávdnui sullii 15-jahkásaš meahccái jápmán ealggas Kuhmo-guovllus nuortarájá alde.

Inarin Angelissa hirvet ovat tavallinen näky pihassa olevassa porojen ruokinta-aitauksessa.
Govva: Kirsti-Helena Länsman / Yle

Suomas lea vuostaš geardde gávdnon gazzaealliid vuoiŋŋašdávda CWD (chronic wasting disease) ovtta ealggas Kuhmo-guovllus nuortarájá alde. Dávda gávdnui sullii 15-jahkásaš meahccái jápmán ealggas.

Biebmogálvodorvvolašvuođadoaimmahat Evira dutkamušaid bohtosat leat sihkkarastojuvvon EU-veardádallanlaboratorias. Dán ovdal dávda lea gávdnon dušše gottiin Mátta-Norggas.

CWD gulul bilida gazzaealli vuoigŋašiid, ja loahpas ealli jápmá dasa. Dat ii galggašii njoammut olbmuide. Dávda gullá seamma luohkkái go jallas gusa dávda.

Ealli gazzaealliid fievrrideapmi gildojuvvo

Sihkkarvuođa dihte dál leat doaisttážii gieldán ovdamearkan ealli bohccuid fievrredeami Suomas olgoriikkaide. Evira mielde goit gazzaelliid bierggu sáhttá borrat dorvvolaččat, eaige bierggu fievrrideami áiggo ráddjet.

Dán rádjai dávdda leat gávdnan Eurohpás dušše Mátta-Norggas. Kuhmos gávdnon ealggas lei seammasullasaš vuoiŋŋašdávda, go mii Mátta-Norggas lea dihtton.

– Dat ii jáhkkimis njoamo bures eallis nubbái, muitala Evira ealliid dearvvasvuođa ja buresveadjima ossodaga ossodathoavda Terhi Laaksonen.

Dávdda áigot čuovvut beaktilabbot

Suomas ja viđa eará EU-riikka guovllus dávdda leat čuvvon jagi 2018 álggus beaktilabbot go ovdal. Suomas leat čuvvon dávdda jagi 2003 rájes. Dán rádjai 2 500 čájánasas eai leat ovdal gávdnan dan.

– Dál áigut beavttálmahttit dávdda čuovvuma Kuhmo ja Kainuu guovlluin. Meahcásteaddjit ožžot dárbbu mielde lasi rávvagiid ovdal čuovvovaš bivdobaji álggu, Evira dieđiha.

Fuolla gazzaelliid vuoiŋŋašdávddas čuohcá maid boazoealáhussii. Bálgosiid ovttastusa doaimmajođiheaddji Anne Ollila muitala, ahte ovttastus čuovvu dili.

– Dutkamušat leat jođus. Ášši galgá váldit duođalaččat, muhto ii gánnet heađástuvvat, dadjá Ollila.

Beaiváduvvon 12.3.2018 dii 12:43: Lasihuvvon Terhi Laaksonen kommeanta, mas son dadjá, ahte dávda ii jáhkkimis njoamu bures eallis nubbái.

Varrasamosat: Sápmi

Váldoođđasat

Varrasamosat

Muualla Yle.fi:ssä