Sápmi |

Geađgeluobbala ođđa tuollostašuvdna lea viháhuvvon otne atnui

Boares tuollostášuvdna lea huksejuvvon 1960-logus. Ođđa stašuvnna huksen mávssii sullii 2,7 miljon euro.

Kivilompolon tulli
Govva: Anni-Saara Paltto / Yle

Geađgeluobbala ođđa tuollostášuvdna Eanodaga ja Guovdageainnu gaskkas lea gárvvásmuvvan. Boares tuollostášuvdna lea huksejuvvon 1960-logus. Ođđa stašuvnna huksen mávssii sullii 2,7 miljon euro ja dan lassin geaidno- ja johtolatortnega huksen mávssii 2,4 miljon euro.

Suoma tuollolágádusa bajimuš hoavda Hannu Mäkinen dadjá, ahte boares tuollostašuvnnaid fertejit ođasmahttit dálá áiggi dárbbuid várás.

– Tuolluid divvuma ákkastallet boarásmuvvan ráhkkanusaid lassin dainna, go maid geavahanulbmilat leat nuppástuvvan. Johtolatmearri lea šaddan máŋggageardásažžan ja maid eará barggut lassánan, nu ahte gáibádusat leat aibbas earálagan go dolin. Dan lassin maid ieš ráhkkanusat leat mieskkamin jo agi dihte.

Suoma tuollolágádus áigu ođadit maid guokte eará tuollostašuvnna, mat leat Norgga rájá alde. Jagis 2017 gárvvásmuvvan Gilbbesjávrri ja dál gárvvásmuvvan Geađgeluobbala maŋŋá vuorus leat Gáregasnjárgga ja Ohcejoga tuollostašuvnnat. Norgga tuollu pláne maid ođadit Norgga beale Njávdáma ja Buolbmága tuollostašuvnnaid.

Varrasamosat: Sápmi

Váldoođđasat

Varrasamosat

Muualla Yle.fi:ssä