Sápmi |

Geahča ja guldal: Ohcejoga gilli čiŋahuvvo mánáid luossadáidagiin

Mánáid luossadáidda boahtá oidnosii Ohcejoga gillái ja dainna leat háliidan čalmmustahttit guovllu guolástanárbevieruid.

Video: Utsjoella sijaitseva lohitaide

Ohcejogas leat ordnen dán vahkus geasseleairra mánáide. Viđa beaivvi guhkkosaš leairra ulbmilin lea fállat mánáide geassedoaimma, go koronadili dihte máŋgasat eai beasa geasseluomu reisui.

– Searvegoddi lea ordnen juohke jagi geasseleairraid, muhto gielda maiddái háliida dán láhkai doarjut mánnábearrašiid ja fállat nuvttá leairra, muitala Ohcejoga asttuáiggečálli Kaisa Tapiola-Länsman.

Leairra váldodoaibma lea luossadáidaga buđaldeapmi. Mánáide lea čuhppojuvvon vaneras luossasilueahttat, maid sii besset leairra áigge málet ja hervet, iežaset mielamiel vugiin.

Okta Ohcejoga guovllu deháleamos árbevieruin lea luossabivdu. Dán geasi dat lea goit gildojuvvon ja danin dan leat háliidan buktit ovdan eará vugiin.

Tapiola-Länsman muitala, ahte Ohcejogas ii leat olu dáidda oidnosis ja jurddašii illudahttit olbmuid luossadáidagiin dál, go luossabivdin lea Deanus gildojuvvon.

Sámešalddi báldii leat ceggejuvvon alit stoalpput ja fierbmelágan áidi. Mánáid luosat giddejuvvojit dáiddabargui, mii dasto govvida buođđobivddu Deanus.

– Iežan mielas das boahtá fiinnis ja dat govvida bures min gieldda. Dáiddabargu ceggejuvvo eaktodáhtolaš bargun ja mánát besset čájehit iežaset čehppodaga, muitala Tapiola-Länsman.

Dáiddabargu oidno juohke guvlui, gos lea johtolat: Njuorggámii, Gáregasnjárgii, Norgii ja máttás.

Varrasamosat: Sápmi

Váldoođđasat

Varrasamosat

Muualla Yle.fi:ssä