Sápmi |

Geahča video: Avvila skuvllalaččat vulge vel čuoigantuvrii miessemánu loahpas

Davvin leat velá dievas čuoigansiivvut. Ovdamearkan Suoločielggi guovllus lea ain measta 80 sentte muohta.

Video: Avvila skuvlalaččat čuiget.
Geahča dán videos, go skuvlalaččat vulge vel čuoigat Anára Laanilas. Video: Maiju Saijets

Miessemánu nubbin maŋimuš vahkus lávejit skuvllain hárve ordnet čuoigantuvrraid. Dán giđa čuoigansiivvut leat goittotge joatkašuvvan gitta dáidda beivviide, go davvin lea ainge máŋgga sajis máŋgalogi sentte muohta.

Ovdamearkka dihte Soađegili Vuohčus lei bearjadaga iđđes sullii 70 sentte muohta. Eanodaga Neakkelis fas 50 sentte ja Ohcejogasge váile 40 sentte.

Avvila vuolleskuvlla njealját luohká oahppit vulge vel dán giđa nubbin maŋimuš skuvlavahkus čuoigantuvrii Anára Laanilai. Doppe ledje ain dievas čuoigansiivvut, go muohtage lei dálkedieđalágádusa mihtidemiid mielde 78 sentte.

Saara-Susanna Parpala, Ivalo
Saara-Susanna Kumpula mielas čuoigantuvrii vuolgin lei suohttasis vásáhus maŋešgiđa. Govva: Maiju Saijets / Yle

– Somá vuolgit čuoigat ja siivuge lea várrá áibbas buorre. Orru vehá amas, go ii dán muttus miessemánus ii láve ná ollu muohta, deattasta avvillaš Joonatan Kumpula.

Seamma oaivilis lea Saara-Susanna Parpala, go stelledii sabehiid juolgái.

– Lea nu liekkas ja dál lea juo miessemánnu, eaige miessemánus láve čuoigat, čilge Saara-Susanna Parpala.

Varrasamosat: Sápmi

Váldoođđasat

Varrasamosat

Muualla Yle.fi:ssä