Sápmi |

Geahča video: Gilbbesjávrris olbmot háliidit eanet ja eanet johtit girddi – Eandaliige leat lassánan nuorra turisttat

Nuorat leat liikogoahtán guolásteamis ja vánddardeamis duoddaris ja meahcis. Giehtaruohttasa guovllus leat dán jagi olbmot háliidan girdiin Boazoetnui.

Video: Helikopteri
Geahča áššis eambbo dás. Video: Marianne Ketola / Yle

Helikopter seaivu Bihčosjávrái viežžat olbmuid ja girdá fas Gilbbesjávrái. Doppe dat deavdá táŋkka ja girdila fas ođđa olbmot fárus. Helikopter girddii dan beaivvi áigge 15 reaissu. Turisttat leat dán geasi háliidan eanet ja eanet johtit girddi.

Lea okta báiki, gosa olbmot eanemusat háliidit, dat lea Boazoeanu. Sivvage lea čielggas, Gilbbesjávrris dohko lea lagabui 50 kilomehtera vánddardanmátki ovtta guvlui.

– Helikopter ii leat dan jagi girdán ollenge Ruoŧa beallái korona dihte. Ovdal Ruoŧa bealle lea leamašan bivnnuheamos vánddardanguovlu, muhto dán jagi geasuha Boazoeatnu, muitala girdi Pekka Tuononen.

Kuva Teemu Makkosesta
Teemu Makkonen joavkku vánddardanreaisu Giehtaruohttasis bistá ovcci beaivvi.

Espoos boahtán vánddardeaddjit vurdet iežaset sáhtu. Álggos sis lei ulbmil mannat Somájávrái, muhto de rievdadedje plánaid ja vulgege Boazojávrái. Sii áigot guolástit ja geahččat daid fiinna eatnamiid, muitala Teemu Makkonen.

– Maid lean geahččan dálkedieđáhusaid ja arvedálkki lohpida, nu njuoska reaisu lea boahtime, muhto sihkkarit šaddá somá, muitalii Makkonen mannan vahkus.

Gilbbesjávrri luondduguovddážis beali eanet guossit go diibmá

Geassemánus suopmelaš mátkkálaččat ledje olu jođus. Luondduguovddážis mannege beali eanet guossit go diibmá.

Gilbbesjávrris oanehis vánddardanbáikkiin turisttat válljejit dávjjimusat fitnat Sáná alde. Kalohttabálgáin leat maid leamaš olu vánddardeaddjit.

Háldi lea maiddái dan jagi bivnnuheamos guhkesmátkki vánddardanbálggis, muitalit Gilbbesjávrri luondduguovddážis.

Suopmelaš vánddardeaddjit ledje jo geassemánus jođus, mii ii leat nu dábálaš. Dábálaččat vánddardeapmi álgá geassemánu loahpas ja suoidnemánus, muitalit Gilbbesjávrri luondduguovddážis.

Varrasamosat: Sápmi

Váldoođđasat

Varrasamosat

Muualla Yle.fi:ssä