Sápmi |

Geahča video: Outi Pieski ládjogahpir-čájáhus lea dál oaidninláhkai sámekulturguovddážis Anáris – “Min máttaráhkut birastit, dorjot ja addet fámuid”

Čájáhus lea oaidnimis Sámekulturguovddáš Sajosis 31.12.2020 rádjái.

Video: Ládjogahpir-čájáhus Anáris, Sajosis
Sámekulturguovddáš Sajosis lea rahpasan vahku dassái čájáhus, mii lea oassi dáiddár Outi Pieski ja dutki Eeva-Kristiina Harlina Máttaráhku ládjogahpir -dáidda- ja dutkanprošeavtta. Video: Vesa Toppari / Yle

Sámekulturguovddáš Sajosis lea rahpasan vahku dassái čájáhus, mii lea oassi dáiddár Outi Pieski ja dutki Eeva-Kristiina Harlina Máttaráhku ládjogahpir -dáidda- ja dutkanprošeavtta. 47 eanemus ohccojuvvon máttaráhkut -čájáhusas leat govat dološ ládjogahpiriin, mat leat iešguđet Eurohpa museain gávdnon.

ládjogahpir
Dološ ládjogahpir. Govva: Vesa Toppari / Yle

Dáiddár Outi Pieski muitala, ahte soai leaba Harliniin hálidan buktit čájáhusa sámekulturguovddážii hui erenomaš siva geažil.

– Seainni nuppebealde lea dat sámedikki parlameantasále ja sávvamis, vaikko dál lea koronaáigi, de dievasčoahkkin sáhttá maiddái čoahkkanit doppe parlameantasáles. Min máttaráhkut dasto birastit sin ja dorjot ja addet fámuid, ahte danin dat lei nu erenomáš dat ášši.

Čájáhusas leat maid oaidninláhkái ođđa ládjogahpirat, maid leaba duddjon duojárat Elle Valkeapää ja Anniina Turunen Anáris.

Elle Valkeapää ja Anniina Turunen duddjon ládjogahpirat
Gurutbealde Elle Valkeapää ja olgešbealde Anniina Turunen duddjon ládjogahpirat Govva: Vesa Toppari / Yle

Olbmot leamaš beroštuvvan čájáhusas, muitala Sajosa márkanastinhoavda Katariina Guttorm.

– Hui olu ja olbmot leat dadjan, ahte dat fertešii leat dáppe álo go dat heive deike nu bures dát čájáhus ja dat maiddái boktá dovdduid buohkaide, olbmuide, muitala Guttorm.

Sajosa márkanastinhoavda Katariina Guttorm
Sajosa márkanastinhoavda Katariina Guttorm illuda go leat ožžon ládjogahpir-čájáhusa viimmat Anárii. Govva: Vesa Toppari / Yle

47 eanemus ohccojuvvon máttaráhkut -čájáhus lea oaidnimis Sámekulturguovddáš Sajosis jagi lohppii.

Guldal dás dáiddár Outi Pieski ja Sajosa márkanastinhoavda Katariina Guttorm jearahallamiid. Jietna: Susanna Guttorm / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä