Sápmi |

Geahča video: Suoločielggis álggahedje geasi čierastallamiin – čierastallan joatkašuvvá nu guhká go leat siivvut

Suoločielggi čuoiganguovddáš rabai čierastallanluohkáidis vel maŋimuš siivvuide.

Miika Otranen ja Jarsse
Miikka Otranen ja Jarsse leigga boahtán Suoločielgái Mátta-Suomas. Govva: Anneli Lappalainen / Yle

Suoločielggis rahppojuvvui čierastallanluohkká geassemánu golmma vuosttas beaivái, muhto jus siivvut joatkašuvvet, de čierastallat beassá olles vahku.

Mikkelilaš Miika Otranen ja lappeenrantalaš "Jarsse" leigga boahtán davás návddašit dálveaktivitehtain. Otranen lei veháš gealdagasas ovdal go luoitilii várrevieltti vulos. Son ii leat ovdal leamašange skirvehallansabehiid alde.

– Jus rehálaččat dajan, de gal mun lean oalle balus, dát lea vuosttas geardi go čierastan.

Jarsse fas lea hárjánan čierastalli. Son lea vuolgán geahččalit, mo muohtačieran johtá njázu muohttagis.

– Gal dat lei earálágan, in leat ovdal dakkár muohttagis čierastan ovdal. Lei gánske váddásut dál, čilge Jarsse, guhte ii háliidan muitalit olles namas.

Video: Laskettelua Saariselällä kesäkuun alussa 2020
Suoločielggi čuoiganguovddáža beaivválaš jođiheaddji Jarmo Katajamaa mielas lea somá leat barggus ja oaidnit movttegis olbmuid. Lappeenrantalaš "Jarsse" oaivvilda, ahte geassesiivvus čierastallan lea oalle erenoamáš. Video: Anneli Lappalainen / Yle

Maŋŋágo lei čierastan, Otranen liikostii čierastallamii nu olu, ahte háliida boahtit nuppe háve maid čierastallat.

– Dalle gal ballen, go leaktu lassánii, muitala son go de lei beassan čavddisin vulos.

– Deikke gal ferte beassat ođđasit, lasiha vel Miika Otranen.

"Lea dego lottovuoitu, go beasaimet rahpat fas"

Suoločielggi čuoiganguovddáža beaivválaš jođiheaddji Jarmo Katajamaa muitala, ahte čuoiganguovddážis lea leamašan mealgat hušša, go rahpe čierastallanluohkáid vuossárgga. Čierastallit ja čuoigit leat boahtán miehtá Suoma.

Čuoiganguovddáš lea vel rabas ain juo otne gaskavahkko. Dan maŋŋá lea gitta das, leatgo vel siivvut.

– Telefon čuodjá oppa áigge ja olbmot jearašit aingo loahppavahkus lea muohta, muhto danhan ii dieđe go leamaš nu liekkas dál. Go de muohta suddagoahtá, de dat suddá johtilit, dadjá Katajamaa.

Son gal sávašii, ahte livčče siivvut vel vahkkoloahpa rádjai.

Jarmo Katajamaa
Jarmo Katajamaa illuda sakka, go besse rahpat čuoiganguovddáža vel veháš áigái. Govva: Anneli Lappalainen / Yle

Suoločielggi čuoiganguovddáš gárttai giddet uvssaidis koronavirusa dagahan dili dihte giđđadálvve, gaskan hohpolamos sesoŋŋa.

Katajamaa illuda, go besse rahpat fas čuoiganluohkáid juobe juo moatte beaivái. Sidjiide čierastallan lea váimmu ášši.

– Dát giđđa leamaš sihkkarit lossat buohkaide, muhto dál go Suoma siste beassá mátkkoštit, de dat orru dego lottovuoitu. Lea somá leat barggus ja oaidnit movttegis olbmuid.

Varrasamosat: Sápmi

Váldoođđasat

Varrasamosat

Muualla Yle.fi:ssä