Sápmi |

Geahččiolahus Ijahis ijas - measta 2 900 guossi oassálaste dáhpáhusaide vahkuloahpas

Anáris vahkoloahpas lágiduvvon eamiálbmogiid musihkkafestivála Ijahis idja dagai vuohon geahččiolahusa. Dáhpáhusa mánáid- ja nuoraidbeaivvi iešguđet bargobájiide oassálaste badjelas 270 máná ja nuora miehtá Sámi. Váldokonsertii vuvde lávvordaga arvvis fuolakeahttá badjelaš 1 200 bileahta.

Ijahis idja 2014, Mari Boine
Mari Boine Govva: Vesa Toppari / Yle

Vahkuloahpas lágiduvvon Ijahis idja festivála geasuhii olu olbmuid ja nu šattaige ođđa geahččioláhus. Lagabui 2900 festiválaguossi oassálaste Ijahis ija iešguđet dáhpáhusaide vahkuloahpa áigge. Okta dán jagáš artisttain lei Mari Boine ja su ledjege máŋgasat boahtán gullat.

– Dát lea fiinna festivála, mun lean measta juohke jagi fitnan. Dál lean boahtán oaidnit Mari Boine, muitala gáregasnjárgalaš Jorma Harlin.

– Dáppe oainnán olu dakkár oahpes olbmuid, maid in dábálaččat oainne. Galhan mii dieđus vuordit dan Sámi stuorra nástti, Mari Boine, dadjá gáregasnjárgalaš Nils Erik Ranttila.

Váldokonseartta stream-sátta lei bivnnut

Ijahis idja eamiálbmotmusihkkafestivála lágiduvvui dál 11. geardde Anáris sámekulturguovddáš Sajosis. Bearjadaga lágiduvvon mánáid- ja nuoraidbeaivvi iešguđet bargobájiide oassálaste badjelas 270 máná ja nuora miehtá Sámi, mii lea eanet go goassige ovdal. Mánáid- ja nuoraidbeaivvi Ijahis ija násttážat -konsearttas ledje juobe 400 geahčči.

Ijahis ija váldokonseartta sáhtii čuovvut streama bokte njuolggosáttan, man Sámi oahpahusguovddáža medialinjá lei lágidan. Streama geasuhii ollugiid ja dan ledje čuovvume juobe 1500 geahčči miehtá máilmmi. Dáhpáhusa váldokonsertii vuvde lávvordaga arvvis fuolakeahttá badjelaš 1 200 bileahta, mii lea lagabui 300 bileahta eanet go diibmá.

Dáhpáhusas ledje loaiddasteame dán jagi earret eará Mari Boine, kárášjohkalaš Felgen Orkester, rock-joavku Gubernator Tšukotka-njárggas sihke logi jagi deavdán skearrofitnodat Tuupa Houseband mánggain sámeartisttaiguin.

Yle Sápmi lei okta Ijahis idja -festivála ordnejeddjiin.

Geahča govaid Ijahis ijas Yle Sámi facebook-siiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä