Sápmi |

Geaidnoguoraid ja bisánanbáikkiid ruskkat barggahan dán geasi – "Olbmot leat maid bálkon ruskaseahkaid geainnuid ala"

Dán gease geaidnoguoraid ja bisánanbáikkiid fuolaheaddjiin lea reahkkán bargu.

Ivalo - Utsjoki-välillå parkkipaikat saattavat olla hyvin roskaisia ja sotkuisia.
Avvila ja Ohcejoga gaskkas leat máŋga bisananbáikki heajos ortnegis. Govva: Joni Haapasaari

Geasseturisma Sámis lea ealáskan dán jagi, muhto seammás dat lea mielddisbuktán hástalusaid. Máŋgga sajis Sámi guovllus leat geaidnoguoraid bisánanbáikkiid ruskalihtit spágga dievva. Eatnamis maid sáhttet leabbát luonit, plastihkaseahkat ja birrasis oidnojit bázahusat.

Lappi EBI-guovddážis muitalit, ahte go leat eanet johttit, de lassánit maiddái ruskkat ja dat lea barggahan eanet dán gease.

– Gal dat oidno viidát Lappi guovllus ja máddelisge. Leat iskan bargat dan ovdii, ahte dieđihit áššis ain eanet, muitala ortnegisdoallanhoavda Markku Tervo EBI-guovddážis.

Luonit geaidnoguoras ja dievvan ruskalihtit eai leat goittotge dušše dán gease iđa. Jagis nubbái geaidnogeavaheaddjit guđđet iežaset mearkkaid.

Dán gease davviguovllu bisánanbáikkiid fuolahanfitnodagat leat goit galgan geavahit veháš eanet áiggi čorgatvuođa ovdii.

Ortnegisdoallanhoavda Markku Tervo muitalage, ahte fitnodagat leat dárkkistan dál bisánanbáikkiid dávjjit go ovddit gesiid amas daid biras menddo nuoskut.

– Gal mis resurssat ain reahkkájit dán bargui. Ruskalihtit leat dál gurrejuvvojit bisánanbáikkiin dávjjibut ja dehálamos vuohki eastit nuoskuma lea gohccit ja reageret jođaneabbo áššiide, oaivvilda Tervo.


Ivalo - Utsjoki-välillå parkkipaikat saattavat olla hyvin roskaisia ja sotkuisia.
Olbmot eai beroš, muhto bálkot luniid meahccái, gos dasto lottit ja eallit lebbejit ruskkaid. Dát govva lea váldon maid Avvila ja Ohcejoga gaskkas. Govva: Joni Haapasaari

Loddit lebbejit ruskkaid, maid olbmot eai leat viššan doalvut lihttái

Tervo morášta dan, mo Davvi-Suoma johtolagas ruskkat leat šáddan dábálaš oainnusin. Juos mátkkosteaddjit eai beroš das, gosa sii bálkestit ruskaseahkaideaset, de leat gal farga eallit ja lottit maid čuoggumin bázahusaid ja lebbemin daid lundui.

– Olbmot leat maid bálkon ruskaseahkaid geainnuid ala. Dieđusge dat lea hástaleaddji, go olbmothan gal basttášedje doalvut ruskkaideaset njuolgga bázahusaide plánejuvvon ruskabáikkiide, mat leat Lappi guovllusge measta juohke gilis. Dál olbmuide orru leamaš stuorra bargu doallat ruskaseahka biillas dan rádjái, ahte rivttes lihtti gávdnošii, muitala Tervo.

– Dieđusge mii sávvat, ahte dat váttisvuohta gáhppánivččii boahtte áiggis ja mátkkosteaddjit besset návddašit buhtes luonddus. Dat lea goittotge buoremus bealli, maid dáppe sáhttá vásihit, sávvá Tervo.

Varrasamosat: Sápmi

Váldoođđasat

Varrasamosat

Muualla Yle.fi:ssä