Sápmi |

Geassebáhkat molsašuvve buolašcehkiide Sámis – goit moatti beaivái

Buolašcehkiid lassin Sámis lea maiddái muohttán.

Stuorra Geađgevárri, Njuorggán
Stuorra Geađgeváris, Njuorggámis muhtii sotnabeaivvi ja mánnodaga gaskasaš ija. Govva: Outi Paadar / Yle

Sotnabeaivvi ja mánnodaga gaskasaš ija leat leamaš idjabuollašat ja muohtti davimus Sámis. Eanodaga Giehtaruohttasis ja Ohcejogas lea muohttán ja šlahttán, nuba Dálkedieđalágádus addá davimus Sápmái váruhusa heajos vuodjinsiivvus.

Dálkedieđalágádusa mielde Gilbbesjávrris mihtiduvvui mannan ija 2,7 buolašceahki. Iđitbeaivve diibmu 10.40 buolašceahkit njidje vel 2,9 ceahkkái. Galbmasamos temperatuvrrat mihtiduvvojedje sulaid duhát mehtera allodagas Sána-duoddaris. Gilbesjávrri giliguovddážis eallisilba bisui galbmasamosge áigge veháš nolla bajábealde.

Buolašceahkit eai leat nu hárvenaččat Sámis dán áigge jagis, muhto maŋimuš beivviid geassebáhkaid maŋŋá dat leat soaitán veháš imaštahttit. Suoma geassemánu buolašolahussii lea goit vel mátki, go jagis 1962 Anáris mihtiduvvui juobe 7,0 buolašceahki.

Idjabuollašat ja muohtti leat vejolaččat vel lagaš beivviid áigge. Dálkedieđalágádus einnosta muohtti goit disdahkii Ohcejohkii ja Anárii.

Varrasamosat: Sápmi

Váldoođđasat

Varrasamosat

Muualla Yle.fi:ssä