Sápmi |

Geasseguossi Bikka Veijola dovdá gullevašvuođa Ohcejohkii, vaikko lea bajásšaddan gávpogis: "Dovddan Ohcejogas eambbo ruovttus go Oulus"

Yle Sámi Geasseguossi -ráiddus 22-jahkásaš Bikka Veijola muitala, mo son mearridii boahtit Sápmái geassebargui. Son lea Oulu Universitehta studeanta ja dovdá gullevašvuođa Sápmái.

Bikka Veijola rannalla istuu viltin päällä
Bikka Veijola čohkkohallá Avvila sáttogáttis bargobeaivvi maŋŋá. Govva: Ida Grønmo / Yle

Bikka Veijola, 22, lea Oulus bajásšaddan, muhto Sámieana lea goit lahka su váimmu, ja son mearridiige boahtit davás geassebargui. Veijola jurddaša, ahte bajásšaddan olggobealde Sámi lea váikkuhan su sámi identitehtii.

Dát lea jo Veijola nubbi geassi Avvilis oahpuide laktáseaddji barggus.

Dat lei áibbas lunddolaš idea boahtit deike geassebargui ja lean gal liikon, de háliidin boahtit fas dán geasi.

Veijola bođii davás, go luondu lea sutnje mearkkašahtti ja sus orrot sogalaččat Ohcejogas. Son dovdá gullevašvuođa Ohcejohkii, vaikko ii leat goassige ássan doppe mánnán. Veijola lea goit giitevaš su vánhemiidda, ahte leaba suinna ja su jumešvielljain fitnan álo luomuid áigge áhku báikkis.

– Ii mu váibmu Oului gal áibbaš. Gal mun liikon Oulus ja mus leat ráhkis ustibat, eadni ja áhčči doppe, muhto mun goittotge dovddan Ohcejogas eambbo ruovttus go Oulus.

Veijola studere njealját jagi birasteknihka oahpuid Oulu Universitehtas. Boahttevuođas son ii leat sihkkar, muhto muitala áibbašit mátkkošteami. Ovdal korona son finai bearašin olgoriikkain ja skihpárin interreilemen. Niehkun sus lea fitnat Ásias ja máŋgga eará riikkas.

Dán agis lea Veijola mielas buorre fitnat oaidnimin máilmmi ovdalgo lea geatnegasvuohta orrut ovtta sajis. Dan maŋŋá lea buorre ráfot.

Don galggat vuolgit guhkás vuoi don sáhtát oaidnit lahka.

Bikka Veijola muitala Geasseguossi-prográmmas iežas studeremis, boahtteáiggis ja gaskavuođas Sápmái.

Guldal Bikka Veijola jearahallama dás. Jietna: Ida Grønmo / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä