Sápmi

Geasseguossi: Goassige ii leat menddo maŋŋit oahppat sámegiela – 60-jahkásaš Saara Palojärvi studere sámegiela gáiddusin

Saara Palojärvi seisoo Tuiran uimarannalla.
Saara Palojärvi lea orron Oulus dál sullii 30 jagi. Govva: Britt-Inger Ruotsala / Yle

Saara Palojärvi lea Eanodagas eret, muhto son lea máŋgalot jagi orron máddin. Sámegiella lea su váibmogiella, man son lea rávesolmmožin álgán studeret.

Saara Palojärvi lea Eanodagas eret, muhto son lea máŋgalot jagi orron máddin. Sámegiella lea su váibmogiella, man son lea rávesolmmožin álgán studeret. Jietna: Britt-Inger Ruotsala / Yle

Saara Palojärvi riegádii 60-logus mihcamáraid áigge Eanodagas. Son lea orron sullii 30 jagi Oulus, gosa son fárrii barggu dihte. Son dadjáge, ahte su ruoktu lea doppe, gos su nuvttohat leat.

Son ii oahppan skuvlamánnán sámegiela, muhto álggii ollesolmmožin stuđeret. Son árvala suomáiduhttima sivvan dasa, ahte vánhemat álge suomastit.

– Sámegiella lea mu váibmogiella ja das boahtá hui liegga dovdu, go gullá dan giela, muitala 60-jahkásaš Palojärvi.

“Giela oahppan lea riggodat”

Giela son lea oahppan iešguđetlágan kurssain ja iežas fulkkiin, geat orrot Norggas. Dál son lea álgán stuđeret sámegiela gáiddusin.

– Rávesolmmožin studeren lea leamášan geahppasut, ii leat nu stuorra gudneáŋgirvuohta dahje streassa oažžut buriid nummiriid. Eambbo studeremis smiehttá dan, ahte beassá geavahit ja hupmat giela earáiguin ovttas.

Son sávvá eambbo sámegiel kurssaid ja dáhpahusaid Oului ja ahte olbmot álggašedje eambbo studeret sámegiela ja geavahit dan. Son rávve álggahit giellaoahpuid vuođđokurssa rájes. Neahta bokte sáhttá guldalit sámegielat prográmmaid ja gárttáin dutkat sámegielat báikenamaid.

– Giela oahppan lea riggodat, oaivvilda Palojärvi.

Studeren lea leamašan hui dábálaš, leat leavssut ja galgá olu lohkat. Oahput bistet juovlamánu rádjái. Palojärvi ii leat vel sihkar, áigugo son dan maŋŋel joatkit oahpuiguin ja studeret sámegiela dutkosa.

Sámegiela studeremis váddásamos lea leamašan a- ja á-bustávaid erohusat jietnadeames, eandalii go buohkat earát su kurssas hupmet nuortasuopmana. Maiddái čállimis leat leamašan hástalusat.

Saara Palojärvi seisoo Tuiran uimarannalla.
Saara Palojärvi sávvá eambbo sámegieldáhpáhusaid Oului. Govva: Britt-Inger Ruotsala / Yle

“Sápmi lea Sápmi, buot buorimus báiki”

Saara Palojärvi muitala, ahte mángasat leat jearran sus, háliidago son fárret ruovttoluotta Sápmái, go beassá ealáhahkii. Dan son ii leat vel mearridan, muhto son lea smiehttan, jus livččii oasi jagis Sámis ja oasi Oulus.

Son lea maid plánen, ahte hálidivččii čálligoahtit girjji iežas eallima birra dan áiggis, go ii lean elrávdnji dahje interneahtta.

Sámis son vaillaha geasset gaskaija beaivvaša ja dálvet guovssahasaid. Palojärvi muitala, ahte son láve geassit fitnat sihke Lulli-Suomas ja Sámis. Davvin son láve vánddardit duoddaris ja návddášit, go beassá leahkit ruovttus.

– Sápmi lea Sápmi, buot buorimus báiki.

Yle Sámi radio sádde Geasseguossi-prográmma mánnodagaid ja bearjadagaid olles geassebaji. Prográmmaid sáhtát guldalit maiddái Yle Areenas.

Varrasamosat

Muualla Yle.fi:ssä