Sápmi |

Geassi álgá Deanus go luossabivdu álgá – báikki olbmot leat oppa giđa vuordán ahte besset bivdui

Gáva-Ilmár ja Gáva-Ilmár Raine loaktiba joga alde oppa geasi.

Video: Ilmari ja Raine Tapiola soutavat Tenolla.
Gáva-Ilmár ja Gáva-Ilmár Raine álggaheigga bivddu Badjegeavgŋás. Ášši lea govven Kirsti Länsman ja doaimmahan Linnea Rasmus. Video: Kirsti Länsman / Yle
ohcejohka

Lávvardaga geassemánu vuosttas beaivve álggii vuot luossabivdu Deanus. Dál báikki olbmuin lea vel váile vahkku áigi guolástit Eurohpá buoremus luossajogas, ovdal go johka dieviha turisttain.

Bivddu álggedettiin eai geargan go jándora guolástit ovdal go álggii jo vuosttas vahkkosaš ráfáiduhttináigi.

Vuossáreahket vehá ovdal ráfáiduhttináiggi nohkama Gáva-Ilmár, Ilmari Tapiola bártniinis Raine Tapiolain leaba viimmat ráhkkaneamen bivdui.

– Dánhan dan vuordá guollebivddu álo. Álo álgá vuorddašit, ahte goas dat álgá. Dáinna guollebivdduinhan dal álggaha dan geasi, dadjá Gáva-Ilmár Raine.

Ilmari ja Raine Tapiola
Gáva-Ilmár ja Gáva-Ilmár Raine luoitiba fatnasa ceakko dearpmi vulos. Govva: Linnea Rasmus / Yle
Soai luoitiba fatnasa ceakko dearpmi vulos. Vaikko dat barggahage fidnet fatnasa Badjegeavgŋá vuollái, ii dat leat duššiid dihtii.

– Dát lea hui fiinna sadji. Dát lea nugo jávri dát Suoma bealle, ahte dás ii dárbbaš mohtora olláge ja oažžu suga leat doppe firpmiid luhtte. Dát lea oalle čáppa ja buorre báiki, rábmo Gáva-Ilmár.

Go fanas lea gáttis, dát guoktá eaba ájáhala. Bárdni njuikesta suhkat ja áhčči suohppugoahtá firpmiid.

– Ferte gaskaija maŋŋá fitnat oahppamin leago čakŋan mihkkige. Vihtta diimmu go lea leamaš, de ferte fitnat sáhkkesvuođa dihtii guovlamin, čilge Gáva-Ilmár.

Raine ja Ilmari Tapiola laskevat verkkoja.
Raine ja Ilmari Tapiola suohppuba firpmiid. Govva: Linnea Rasmus / Yle

Ođđa fierbmemearrádusat giksin

Vaikko buriin mielain leabage joga alde bivddu álggaheamen, de okta ášši hárdá Gáva-IImára. Son lea čakčat moardán ođđa firpmiid, muhto mánotbadji ovdal bivddu álgima gulai, ahte daid son ii oaččoge suohpput Detnui.

Eana- ja meahccedoalloministeriija lea giđđat dahkan ođđa fierbmemearrádusaid, maid mielde dihtolágan fiiberfirpmiid ii oaččo šat geavahit. Ráđđádalli virgeolmmoš Tapio Hakaste dadjá, ahte mearrádus lea seamma, mii lei ovddit Deanu soahpamušas.

– Háliideimmet sihkkarastit, ahte jogas eai váldojuvvo atnui máŋgafiiberfierpmit, mat leat hui asehaččat ja nannosat, eaige leat árbevirolaččat leamaš geavahusas, čilge Hakaste.

Son lasiha, ahte mearrádusa dahkama olis leat gulahallan Sámedikkiin. Diehtu goit juvssai dábálaš guolásteaddjiid easka mánotbadji dassái. Gáva-Ilmár ii lean das mielas.

– Vehá lea fuones miella daid ministeriija olbmuid vuostá. Juohke jagi molsašuvvet mearrádusat ja áigi ii leat ráhkkanit ođđa bivdosiiguin.

Ilmari Tapiola Tenolla.
Gáva-Ilmár, Ilmari Tapiola. Govva: Linnea Rasmus / Yle

Nu mo diibmá ja ovddit jagi, de maiddái dán gease golgadanjándorat leat dušše njeallje. Gáržžiduvvon bivdobeivviid dihtii Gáva-Ilmár ii leat máŋgga jahkái gillen golgadit.

– Njeallje jándora dihtii ii viša oba álgit moarditge firpmiid, ahte dat gal oažžu mu dihtii orrut. Dat lea nu oanehis áigi, ahte dasa ii gánnet gal oba ráhkkanitge.

Vuordiba jo buođđobivddu

Go coahku, leaba áhčči ja bárdni gergosat buođđut. Joga alde loaktiba olles geasi.

– Gal dat stuorra oassi lea mu geasis dat guollebivdu, joga alde manná juogo dáid njáŋggofirpmiiguin dahje buođuin. Buođđumis manná stuorra oassi geasis, dadjá Gáva-Ilmár Raine.

Raine Tapiola Tenolla.
Gáva-Ilmár Raine, Raine Tapiola. Govva: Linnea Rasmus / Yle

Dál johka lea dulvvis iige sudnos leat vel hoahppu buođđut.

– Dat lea buorre go vehá dulvvai. Gal giđđat dán muttos áiggi galgá leat vehá dulvi, ahte luossa beassá friija de boahtit doppe ja goargŋut maiddái dohko johkagierragiidda, dadjá Gáva-Ilmár.

Varrasamosat: Sápmi

Váldoođđasat

Varrasamosat

Muualla Yle.fi:ssä