Sápmi |

Geatkki oažžu fas bivdit spiehkastatlobiin – dát lea njealját dálvi, go mieđihit bivdolobi gávcci geatkái

Dán dálvvi geatkki beassá bivdit árabut go ovddit jagiid vai gerget ovdal go geatki besse.

Ahma hangen päällä.
Boraspiriin geatki dagahaga eanemus vahágiid boazodollui. Govva: Tuomo Karsikas

Suomas oažžu maiddái dán bivdojagi bivdit spiehkastatlobiin gávcci geatkki.

Eanan- ja meahccedoalloministeriija ásahus spiehkastatlohpebivddus bivdojahkái 2019–2020 bođii fápmui otne duorastaga. Dat lea fámus 31.7.2020 rádjai.

Spiehkastatlobiid sáhttá ohcat dušše boazodoallodoalloguovllus Kuusamo, Suomussalmi, Hyrynsalmi, Taivalkoski, Salla, Savukoski, Pelkosenniemi, Soađegili, Muoná, Kolari, Gihttela, Anára, Ohcejoga ja Eanodaga gielddain. Lobiid ferte ohcat ja daid mieđiha Suoma fuođđoguovddáš.

Geatki leamaš Suomas ráfáidahtton jagi 1982 rájes. Dát lea dál njealját dálvi maŋŋálagaid, go spiehkastatlobiin oažžu bivdit gávcci geatkki.

Mannan dálvvi Eanodaga, Hyrynsalmi, Salla ja Soađegili gielddain godde ovtta geatkki, Savukoskis ja Suomussalmis guokte.

Bivdu álgá árabut go ovdal

Dán dálvvi geatkki beassá bivdit árabut go ovddit jagiid.

– Áradeimmet ášši válmmaštallama ovddit jagiid ektui vai geatkebivddu sáhtášii ollašuhttit ovdal guovvamánu, goas geatkki bessenáigi dábálaččat álgá, dadjá eana- ja meahccedoalloministtar Jari Leppä ministeriija dieđáhusas.

Spiehkastatlobiiguin lea ulbmilin eastadit geatkki dagahan vahágiid boazodoalus. Boraspiriin geatki dagahaga eanemus vahágiid boazodollui.

Eana- ja meahccedoalloministeriijas leat gávnnahan, ahte vahágat leat maŋimuš golmma jagi áigge geahppánan stuorámus oasis daid bálgosiin, gosa spiehkastatlobiid leat mieđihan. Ministeriijas goit árvalit, ahte geahppáneapmái sáhttet leat earáge sivat go geatkebivdu, dego muohta- ja dálkedilli.

Varrasamosat: Sápmi

Váldoođđasat

Varrasamosat

Muualla Yle.fi:ssä