Sápmi |

Geneves ságastallet dán vahkus álgoálbmotáššiin – Deanu ášši leamaš maid ovdan čoahkkimis

Sámedikki nubbi várreságadoalli Tuomas Aslak Juuso lea Suoma sámedikki beales oassálastimen EMRIP eamiálbmogiid rivttiid áššedovdimekanismma čoahkkimii Sveiccas, Geneves.

Tuomas Aslak Juuso 23.2.2016
Tuomas Aslak Juuso 23.2.2016 Govva: Yle

Geneves leat ságastallan EMRIP ođđa mandáhtas. Dát lea vuosttaš geardi, go EMRIP doaibmá ođđa mandáhtain. Suoma sámedikki mielas ođđa mandáhtas leat buorit vejolašvuođat geahččat mo álgoálbmotjulggaštus lea ovdáneamen, ja mainna lágiin buriid čovdosiid galggalii iešguđet sajiiguin dahkat, earenoamážit riikkadásis.

– Dat lea váilon mu mielas goit ovdal, dakkár viidát vejolašvuohta EMRIP:as njuolga váldit oktavuođa ovttaskas riikii guoskevaš áššiide, ja dál dat lea vejolaš.

EMRIP lea maiddái ovdanbuktán iežas dárkilut čilgehusa das, mo sii áigot bargat.

– Dasto maiddái dáppe lea sáhka álgoálbmotturismma birra, álgoálbmotdearvvašvuođa birra, álgoálbmotoassálastimis Ovttastuvvon Našuvnnain, ja dat lea viiddis prográmma, muitala Juuso EMRIP čoahkkima fáttaid birra.

Bovdejit vejolaččat Supmii

Tuomas Aslak Juuso doalai čoahkkimis sáhkavuoru 10.7. Juuso buvttii sáhkavuorustis ovdan áššiid EMRIP:a ođđa mandáhta doaibmavejolašvuođain, ja ahte sii leat duđavaččat ođđa mandáhtii.

– Mii boahtit dál geahččat Suoma sámedikkiin vejolašvuođaid bovdet vejolaččat EMRIP:a geahččat dieid Suoma siskkáldas áššiid.

Sápmelaččat leat buktán EMRIP:as viidát áššiid ovdan.

– Mis lea odne ovdamearkka dihte álgoálbmotoassálastinrievttis ON:as sáhkavuorru ja maŋŋelabbos sámedikkiid oktasaš sáhkavuorru álgoálbmotjulggaštusa čađaheamis logi jagis. Ja mii ovdanbuktit iežamet fuolaid ja evttohusaid, mo ain galggašii mannat viidásit. Deanu ášši lea leamašan okta ášši, mii lea maid loktejuvvon dáppe bajás, muitalii Juuso gaskavahku 12.7.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä