Sápmi

Giđa studeanta sávvá studeantadoaluid: "Buoret čakčatge go ii ollege"

Siiri Ranttila
Siiri Ranttila háliidivčče ávvudit logahatáiggi nohkama ja deaddilit giđđat vilgesgahpira oaivái ovttas earáiguin. Govva: Kirsti Länsman / Yle

Skuvllaid válmmaštuvvandoalut leat dán jagi earáláganat go ovdal. Nuorat leat eahpesihkkaris dilis go eai dieđe, man guhká koronavirusa dagahan spiehkastatáiggit joatkašuvvet.

Nuoraide dehálaš válmmaštuvvandoaluid dilli lea ain eahpesihkkaris vuođu alde. Koronavirusa njoammunvára dihte spiehkastatdilli sáhttá sirdit giđa studeantadoaluid juobe čakčii.

Máŋggain logahagain áigot vuordit badjel beassážiid ovdal go mearridit, mo válmmaštuvvandoaluiguin meannudit.

Anárlaš abiturienta Siiri Ranttilai, 18, studeantadoalut leat dehálaš stoalpu eallimis. Son háliidivčče ávvudit logahatáiggi nohkama ja deaddilit giđđat vilgesgahpira oaivái ovttas earáiguin.

Dál goit ii leat sihkkar, ollašuvvetgo feasttat geassemánu álggus.

– Gal mun livččen fulkkiid ja skihpáriid bovden, ja birra Suoma livčče boahtán olbmot.

Stuorra feasta livččii nuorra nissonii dehálaš. Son lea vázzán golbma jagi logahatoahpuid, ja beaivi lea ovttalágan bálkkašupmi das, ahte lea nagodan čađahit skuvlla buoremus lági mielde.

– Váivi, jus ii sáhte moge doallat daid doaluid. Livččii gal somá, go dat lea vehá stuorát dáhpáhus eallimis.

Evttohit oktasaš válmmaštuvvanbeaivvi maŋŋelii

Suoma logahatohppiid searvi (Suomen Lukiolaisten Liitto) lea maiddái gieskat váldán beali dasa, ahte studeanttaid válmmaštuvvanbeaivvi eai šluhtteše oalát. Searvi baicce evttoha olles Suomas oktasaš válmmaštuvvanbeaivvi álgočakčii.

Lukiolaisten liiton puheenjohtaja Adina Nivukoski.
Dán giđa, dego ovddit jagiidge, studeanttain galggašii leat vejolašvuohta guođđit earrodearvvuođaid boares skuvlii ja logahatservošii, dadjá Suomen Lukiolaisten Liitto ságadoalli Adina Nivukoski. Govva: Adina Nivukosken kotialbumi/kuvaaja Olivia Takkinen

Studeantadoalut leat okta daid dehálamos beivviin nuorra olbmo eallimis, logahagaid árbevieruin ja bálkkašupmi áŋgiris studeremis, ja nuorain galgá leat vejolašvuohta ávvudit dan, cealká lihtu.

– Dán giđa abiturienttat leat válmmaštuvvamin studeantan garra preassa vuolde, go čállimat juo sirdásedje, allaskuvllaid oahppiidválljen ođasmuvvá ja olles dilli lea hui eahpesihkkaris vuođu alde, dadjá Suomen Lukiolaisten liitto ságadoalli Adina Nivukoski.

Maiddái Suoma oahpahusministtar lea váldán beali válmmaštuvvanfeasttaid ollašuhttimii.

Oahpahusminister Li Andersson (gurut.) mielde válmmaštuvvanfeasttaid háliidit fállat maiddái daidda nuoraide, geat gerget dán giđa skuvllain. Dábálaš vuogi mielde feasttaid ii dáiddeš sáhttit doallat geassemánu álggus koronadili dihte.

– Mii geahččalit gávdnat studeanttaide ja ámmáhii válmmaštuvviide oktasaš válmmaštuvvanbeaivvi.

Ministtar namuhii goit, ahte válmmaštuvvanfeasttat dahje daid ordnenáigi ii gula oahpahus- ja kulturministeriija doaibmaváldái. Ášši lea goit ságastahttán ollu, de ministeriija áigu gulahallat iešguđet surggiiguin vai válmmaštuvvandoaluide gávnnašedje oktasaš beaivvi. Mearrádus guoskkašii dasto buot nuppi dási oahpahusa, nappo maiddái ámmátoahpu studeanttaid.

Vihkkehallaba čakčageasi doaluid

Sihke Siiri Ranttila ja su eadni Uhca Ásllat Elle Kristiina, Kristiina Ranttila leaba ovttaoaivilis logahatoahppiid lihtuin ja oahpahusministariin, ahte muhtinlágan doalut galggašedje leat ovdalgo nuorat dollejit ollesolbmuid máilbmái ja vejolaš joatkkaoahpuide.

Siiri ja Kristiina Ranttila
Siiri ja su eadni Kristiina geahčadeaba, makkár čiŋat heivešedje studeantafestii. Govva: Kirsti Länsman / Yle

– Mun háliidivččen, ahte dat sirdásit čakčii, ahte sáhtášii ráfis ja álggu rájes plánet daid doaluid.

Siiri Ranttila eadni Kristiina Ranttila mielas lea maid dehálaš, ahte doalut ordnejuvvojit juobe čakčagease go eai oba ollege.

Dál dušše smiehtadeaba dan, ahte astetgo fuolkkit ja ustibat boahtit loahppagease šat studeantafeasttaide, go várra luomuidge ledje ráhkkanan váldit geassemánu álgui.

– Leatgo olbmuin dalle luomut, go siige leat plánen boahtit deike giđđat. Jus dat sirdásit čakčii, de oaidnit leaš. Leatgo mis dalle unna bearraša gaskasaš doalut vai makkár doalut dat šaddet, vihkkehallá Uhca Ásllat Elle Kristiina.

Varrasamosat

Muualla Yle.fi:ssä