Sápmi |

Giđa studeantaiskosat nohket sámegiela eatnigiellan čállimii – "Korona váikkuhii positiivvalaččat sámegiela iskosii"

Koronavirus dagahii hástalusaid dán giđa studeantaiskosiidda, muhto Siiri Ranttilai dat lei buorre sámegiela čállima ektui.

Siiri Ranttila
Anárlaš Siiri Ranttila illuda, go lea farga geargan studeantačállimiin. Govva: Siiri Ranttila

Logahaga maŋimuš luohká ohppiid, abiturieanttaid, áŋgiruššan nohká otne vuossárgga sámegiela eatnigiellan čállimii. Sámegiella vierisgiellan čállojuvvui juo ovddit vahkus.

Anárlaš Siiri Ranttila lea ilus go lea farga geargan studeantačállimiin. Sámegiela čállin ii stresse goittot su. Ranttilai suomagiela ja matematihka čállimat ožžo váimmu julkit garrasabbot.

Ranttila čálii sámegiela lassin kemiija, biologiija, ruoŧagiela, guhkes matematihka, fysihka, suomagiela eatnigiellan ja eaŋgalasgiela.

– Vahkkoloahpa gergen vehá geahčadit eatnigiela girjjiid go reálaávdnasiid čállimat ledje jo, muđui in leat gal ráhkkanan dađi gummebut.

Eatnigiela studeantaiskosis árvvoštallet, mo oahppi lea juksan logahaga mihttomeriid eatnigiela oasil.

Sámegiella eatnigiellan -studeantaiskkus lea esseaiskkus ja fáddán leamašan maŋimuš jagiid áigge áigeguovdilis sámeáššit. Geahča giđa 2019 sámegiella eatnigiellan -studeantaiskosa dáppe.

"Koronavirus váikkuhii positiivvalaččat sámegiela iskosii"

Koronavirusa dihte studeantačállimiid áigetávvala gárte čavget nu, ahte buot reálaávdnasiid čálle mannán vahkus. Dat dárkkuhii dan, ahte muhtin oahppis sáhtii leat studeantaiskkus juohke beaivve mannán vahkus.

Siiri Ranttilas maid deive leat iskosat golbma beaivve maŋŋálagaid.

– Mis ledje golbma iskosa maŋŋálaga, de dat lei oalle lossat. Nuppedáfus dat váikkuhii dan láhkai positiivvalaččat, ahte dál asten vuodjut eambo dan sámegiela čállimii, muitala Ranttila.

Varrasamosat: Sápmi

Váldoođđasat

Varrasamosat

Muualla Yle.fi:ssä